O‘zbekiston ikki fuqarolikni kiritishni rejalashtirmayapti

O‘zbekistonda yaqin yillar davomida ikki fuqarolikni kiritish masalasi ko‘rib chiqilmaydi, deb xabar berdi Sputnik. 

O‘zbekiston Adliya vaziri o‘rinbosari Nodir Jo‘rayevning so‘zlariga ko‘ra, ikki fuqarolik kiritilishi haqidagi ma'lumotlar — mish-mishdan boshqa narsa emas.

"Bu haqda gap bo‘lishi mumkin emas. Bizning davlatimizda bitta fuqarolik bor. O‘zbekistonda ikki fuqarolik masalasi muhokamaga kiritilgani haqidagi ma'lumotlar haqiqatdan yiroq. Bu shunchaki — mish-mish. Balki, xorijga chiqish pasportlari kiritilishi rejalashtirilayotgani bois, kimdir bu masalani o‘zicha talqin qilgan bo‘lishi mumkin", - deya ta'kidlab o‘tdi Jo‘rayev.

Ma'lumot uchun, Konstitutsiyaga ko‘ra, O‘zbekistonda butun respublika hududi uchun yagona fuqarolik o‘rnatiladi. U barcha uchun uni olish asoslaridan qat'iy nazar bir xil hisoblanadi. Shu bilan bir qatorda, O‘zbekiston Respublikasi fuqarosi bo‘lgan shaxs tomonidan xorijiy davlat fuqaroligiga kirishi tan olinmaydi.