AQSh F-35 samolyotlarini birinchi marotaba Yevropada joylashtiradi

AQSh harbiy-havo kuchlari o‘zining 5-avloddagi F-35A qiruvchi-bombardimonchi samolyotlarini shu yil bahori yoki yozida birinchi marotaba Yevropada joylashtiradi. Bu haqda AQSh HHK jangovar qo‘mondonligi boshlig‘i, general Gerbert Karlayl jurnalistlarga ma'lum qildi.  

Karlayl AQSh bu harbiy samolyotlarni Osiyo-Tinch okeani va Yaqin Sharq mintaqalariga jo‘natishni rejalashtirayotganini ham aytdi. 

F-35 ko‘p maqsadli jangovar samolyot bo‘lib, aniqlashni pasaytiruvchi texnologiya qo‘llab loyihalangan va yadroviy jangovar zaryadlar olib yura oladi. Uning yaratilishida AQSh bilan birgalikda 8 ta davlat ishtirok etgan: Avstraliya, Buyuk Britaniya, Daniya, Italiya, Kanada, Niderlandiya, Norvegiya va Turkiya. 

AQShda ushbu samolyot uchta variantda: harbiy-havo kuchlari, harbiy-dengiz kuchlari va dengiz piyoda qo‘shinlari korpusi uchun ishlab chiqariladi. Samolyotning piyoda qo‘shinlar uchun mo‘ljallangan varianti vertikal holda uchib-qo‘na oladi.