Meksika prezidenti AQSh bilan qanday munosabatlar o‘rnatish niyatida ekanini bildirdi

Meksika prezidenti Enrike Penya Neto Vashington ma'muriyati bilan normal munosabatlar o‘rnatish istagini bildirdi, deb xabar qilmoqda RIA «Novosti» agentligi.

U bu haqda AQSh davlat kotibi Reks Tillerson va milliy xavfsizlik vaziri Jon Kelli bilan uchrashuvi yakunlariga ko‘ra bayonot bergan. 

«Donald Tramp ma'muriyati boshqaruvining boshlang‘ich bosqichida ikki vazirning Meksikada bo‘lishi ijobiy munosabatlar o‘rnatish manfaatdorligidan darak beradi. Bu o‘z navbatida Meksika va Qo‘shma Shtatlar xavfsizligi, taraqqiyoti va farovonligi uchun eng yaxshi sharoitlarni barpo qiladi», — degan Meksika yetakchisi. 

Enrike Penya Netoning ta'kidlashicha, mamlakat hukumati uchun AQShdagi meksikaliklarning huquqlarini himoya qilish muhim vazifalardan biridir. 

Bundan avvalroq, AQSh milliy xavfsizlik vaziri Jon Kelli AQShdan Meksikaga deportatsiyalarni amalga oshirishda harbiylar xizmatidan foydalanilmasligiga oydinlik kiritgan edi.