Qoʻshimcha funksionallar
-
Tungi ko‘rinish
AQSh Yevropa hududidan aviatashuvchi va suvosti kemasini olib chiqadi
AQSh Yevropa hududidagi NATO operatsiyalari uchun ajratilayotgan harbiy texnika va kuchlar hajmini sezilarli darajada qisqartirishni rejalashtirmoqda. The New York Times ma’lumotiga ko‘ra, Vashington qiruvchi samolyotlar sonini qariyb uchdan bir qismga kamaytiradi, shuningdek, aviatashuvchi va suvosti kemasini ham alyans tasarrufidan chiqaradi.
The New York Times nashrining yozishicha, AQSh Yevropa hududida NATO operatsiyalarini qo‘llab-quvvatlash uchun ajratilayotgan jangovar samolyotlar va harbiy kemalar sonini qisqartirish niyatida. Nashr bu haqda ikki nafar yuqori lavozimli yevropalik manbaga tayanib xabar bergan.
Ma’lum qilinishicha, mazkur reja NATOning uzoq masofaga zarba berish va razvedka imkoniyatlarini cheklashi mumkin. Yevropa davlatlariga ushbu reja iyun oyi boshida yozma hujjat ko‘rinishida taqdim etilgan.
Hujjatga ko‘ra, AQSh NATO ixtiyoriga berilayotgan F-16 va F-15E rusumli qiruvchi samolyotlar sonini hozirgi taxminan 150 tadan 100 tagacha qisqartirishni rejalashtirmoqda. Shuningdek, dengiz razvedka samolyotlari soni 26 tadan 15 taga tushiriladi.
Bundan tashqari, Yevropa hududidan barcha havoda yonilg‘i quyish samolyotlari chiqarib ketiladi. Raketa tashuvchi suvosti kemasi, aviatashuvchi, bir qator harbiy kemalar hamda aviatashish missiyalarida ishtirok etayotgan o‘nlab samolyotlar boshqa hududlarga ko‘chiriladi.
Nashr manbalariga ko‘ra, bu jarayon Yevropa ittifoqchilari kutganidan ancha erta boshlanishi mumkin.
Avvalroq Germaniyaning Die Welt nashri ham AQSh NATOga maxfiy hujjat taqdim etganini xabar qilgan edi. Unda Amerika harbiy huzurini qisqartirishga oid 11 ta band mavjud bo‘lib, asosiy e’tibor Vashingtonning Tinch okeani mintaqasiga yo‘naltirilayotgani qayd etilgan.
Pentagon NATOdagi ishtirokini qayta ko‘rib chiqmoqda
Der Spiegel jurnali ma’lumotlariga ko‘ra, Pentagon rahbari Pit Hegsetning NATOdagi vakili alyans davlatlari rasmiylariga AQSh kelgusida NATO uchun kamroq harbiy resurs ajratishini ma’lum qilgan.
Jumladan, qiruvchi samolyotlar, harbiy kemalar, dronlar, havoda yonilg‘i quyish samolyotlari va strategik bombardimonchilar soni qisqartirilishi rejalashtirilgan.
Hozirgacha NATO harbiy salohiyatining qariyb yarmi AQSh hissasiga to‘g‘ri kelar edi. Endi Vashington Yevropa davlatlaridan qisqartiradigan yo‘nalishlarda o‘z o‘rnini bosish bo‘yicha takliflar kutayotgani aytilmoqda.
AQSh Yevropadagi harbiy kontingentini ham qisqartirmoqda
May oyida Pentagon Yevropa hududida joylashgan to‘rtta jangovar brigada guruhidan birini olib chiqishini ma’lum qilgan edi.
Bu qarordan keyin AQSh harbiylari soni Yevropa mintaqasida 2021 yil darajasigacha kamayadi. So‘nggi yillarda AQSh Yevropada taxminan 100 ming nafar harbiy xizmatchini saqlab kelayotgan bo‘lib, ularning 65 mingdan ortig‘i doimiy asosda xizmat qilgan.
