«Oskar-2017» taqdimotiga oxirgi 9 yildagi eng kam darajada qiziqish kuzatildi

AQShda 2017 yilgi «Oskar» mukofotlarini topshirish marosimi ekranlarda 32,9 mln teletomoshabinni o‘ziga jalb etdi, bu esa 2008 yildan buyon ushbu marosimga bo‘lgan eng kam qiziqish demakdir.

Reuters agentligi xabarida qayd etilishicha, taqdimot teletomoshabinlari miqdori o‘tgan yildagiga nisbatan 4 foizga kamaygan, 2016 yili marosim auditoriyasi 34,4 mln kishini tashkil qilgandi.

Shu bilan birgalikda ushbu kinotaqdimot hamon Amerika televideniyesidagi eng ommabop marosim bo‘lib qolmoqda.

Bundan oldingi xabarlarda «Oskar» yakunidagi xatolik «Koinot go‘zali» marosimidagi adashuv va AQShdagi prezidentlik saylovlariga qiyoslangani aytilgandi.