“Janob Hechkim Putinga qarshi” filmi “Oskar”ni qo‘lga kiritdi

Pavel Talankin va Devid Borenshteynning Rossiya maktabidagi harbiy targ‘ibot haqida hikoya qiluvchi “Janob Hechkim Putinga qarshi” (Mr. Nobody against Putin, 2025) filmi Amerika kinoakademiyasining “eng yaxshi hujjatli film” yo‘nalishidagi “Oskar” mukofotiga sazovor bo‘ldi. Mukofotning 98-marosimi Los-Anjyelesdagi (Kaliforniya shtati) Dolby teatrida bo‘lib o‘tmoqda.

Foto: Mike Blake/REUTERS

Borenshteyn ushbu kartinani mamlakatni qanday yo‘qotish mumkinligi haqidagi film deb atadi.

“Biz bu kadrlar ustida ishlaganimizda, mamlakatni sanoqsiz mayda-mayda sheriklik harakatlari orqali yo‘qotish mumkinligini ko‘rdik. Ammo baxtga qarshi emas, hatto ‘hechkim’ ham siz o‘ylagandan ancha kuchliroq bo‘lishi mumkin”, — dedi u.

Talankin esa sahnadan turib, “barcha urushlarni to‘xtatish”ga chaqirdi.

“To‘rt yildan beri biz yulduzli osmonga qarab, eng muhim tilakni tilayapmiz. Juda muhim tilakni. Ammo shunday mamlakatlar borki, u yerda osmondan yulduzlar o‘rniga bombalar tushadi va dronlar uchib keladi. Kelajagimiz uchun, barcha bolalarimiz uchun, keling, barcha urushlarni to‘xtataylik. Hozirning o‘zida”, — dedi u.

Film asosiga Chelyabinsk viloyatining Karabash shahridagi maktablardan birida pedagog-tashkilotchi bo‘lib ishlagan Talankin tomonidan 2022 yil fevralida Rossiyaning Ukrainaga keng ko‘lamli bostirib kirishi boshlanganidan buyon suratga olingan videoyozuvlar qo‘yilgan.

Talankinning vazifalari qatoriga saflanish tadbirlari, tanlovlar va ochiq darslar kabi tadbirlarni tasvirga olish ham kirgan. 2024 yil yozida Talankin ikki yil davomida suratga olgan materiallari bilan Rossiyani tark etdi, shundan so‘ng u ushbu ishni amerikalik rejissyor Borenshteyn bilan hamkorlikda montaj qildi.

Film premerasi 2025 yil 25 yanvar kuni AQShdagi mustaqil kinoning “Sandens” festivalida bo‘lib o‘tdi va u yerda maxsus hakamlar hay’ati mukofotini qo‘lga kiritdi. 22 fevral kuni Londonda bo‘lib o‘tgan Britaniya kino va televideniye san’ati akademiyasi (BAFTA) mukofotining 79-marosimida “Janob Hechkim Putinga qarshi” filmi “eng yaxshi hujjatli film” deb topildi.

DW’ga bergan intervyusida Talankin, maktabda pedagog-tashkilotchi sifatida urush boshlanganidan keyin maktab ritorikasi qanday o‘zgarganini qayd etib borganini, 24 fevraldagi shok holatini, ta’lim vazirligidan kelgan ko‘rsatmalarni hamda to‘rt yil ichida Rossiya maktablarida muhit qanday o‘zgarganini so‘zlab berdi.