Novosibirskda o‘zbek gazlama va gilamlari sotilishi mumkin

Rossiyaning Novosibirsk viloyati gubernatori O‘zbekistonning Andijon viloyati hokimiga do‘stlik haqida shartnoma tuzishni taklif qildi. Bu haqda “Novosibirskiye novosti” xabar berdi. 

O‘zbekistonlik tadbirkor va siyosatchilarning katta delegatsiyasi ayni damda Sibir poytaxtida bo‘lib turibdi.

«Rossiya Federatsiyasi O‘zbekiston Respublikasining muhim sherigi hisoblanadi, u bilan munosabatlar strategik xarakterga ega va barcha yo‘nalishlarda izchil rivojlanmoqda. Andijon viloyati delegatsiyasi tashrifi O‘zbekiston Respublikasi prezidentining Rossiyaga joriy yilning aprel oyidagi tashrifidan avval amalga oshirildi», - deya ta'kidlab o‘tdi Andijon viloyati hokimi Shuhratbek Abdurahmonov.

O‘zbekistonlik tadbirkorlar Novosibirskda savdo uyi ochishni taklif qilishdi. U yerda nafaqat O‘zbekistonning mashhur meva hamda sabzavotlari sotiladi. Hududga shuningdek gazlama, yigirilgan ip va gilamlar ham yetkazib berilishi mumkin.

Novosibirsk meri g‘oyani qo‘llab-quvvatladi, sababi shaharda sotuvchi hamda xaridorlar uchun qulay bo‘lgan zamonaviy bozorlar tashkil etilmoqda.

Muloqot yozda davom ettiriladi. O‘zbekiston delegatsiyasi "Shahar kuni" bayram tadbirlariga taklif etildi.