Toshkent shahar Uchtepa tumani IIB xodimlari juda katta miqdorda amalga oshirilgan o‘g‘irlikni fosh qilishdi, deb xabar bermoqda Nuz.uz nashri.
Uch nafar buxorolik fuqarolar bozor omborxonalaridan mahsulotlarni o‘g‘irlab, ularni pullash usulini o‘ylab topgan.
"O‘g‘rilar omborxonaga tunda kelishgan. Qorovullar esa ular konteyner egalari bo‘lganiga ishonchi komil bo‘lgan va ularni o‘tkazib yuborgan. Jinoyatchilar omborxonaga kirib, biror konteyner qulfini ochib, narsalarini yuk mashinasiga ortib, konteynerni esa yana qulflab ketaverishgan. Shunday ishlar bir necha oy davom etgan. O‘g‘rilar asosan qurilish mollari, texnika va elektronika saqlanayotgan omborxonalarni tanlab olishgan. Shuningdek ular avtomobil ta'miri uchun kerakli qimmatbaho mahsulotlarni ham o‘g‘irlashgan", — deb hikoya qilib bergan Uchtepa tuman IIB tergov bo‘limi boshlig‘i Jafar Amonov.
O‘g‘irlangan mollarni jinoyatchilar yarim bahoda Toshkentning boshqa bozorlarida sotishgan yoki Buxoro viloyatiga jo‘natishgan.
Qizig‘i shundaki, ushbu ish yuzasidan qidiruv ishlari jabrlanganlar arizasi tufayli emas, hududni nazorat qilayotgan huquqni saqlash organlari xodimlari tashabbusi bilan boshlangan.
Dastlab "O‘rikzor" bozorida paydo bo‘layotgan juda arzon mollar tezkor-qidiruv xodimlari diqqatini tortgan. Keyin ular konteyner egalaridan yo‘qolgan mahsulot haqida so‘rab surishtira boshlashdi. Konteyner egalari mahsulotlarini qayta sanab chiqib, yo‘qolgan narsalarni aniqlashgan. Shundan keyin militsiyaga bir necha ariza kelib tushdi.
"Eng katta zarar avtomobil ta'mirlashda ishlatiladigan lak-bo‘yoq mahsulotlari sotuvchilariga yetkazilgan — 122 mln. so‘m. Shuningdek bir necha yuz millionlik televizorlar, isitgichlar, konditsionerlar va qurilish mollari o‘g‘irlangani aniqlandi," — degan tergovchi.
Jinoyatchilar qo‘lida bo‘lgan telefonlar orqali o‘g‘irlangan mollarni sotib olgan barcha sotuvchilar ham aniqlangan. Ularning Telegram messenjeri orqali olib borgan suhbatidan xaridorlar ushbu mahsulotlarning kelib chiqishidan xabardor bo‘lgani aniqlangan. Shu tufayli xaridorlar ham jinoiy ish ishtirokchilariga aylangan.
Jinoy guruhning barcha a'zolariga bir necha yillik ozodlikdan mahrum qilish jazosi berilishi kutilmoqda.
