Kolumbiyada sel tufayli 14 kishi halok bo‘ldi

Kolumbiyaning Putumayo departamenti poytaxti Mokoada sel oqishi tufayli kamida 14 kishi halok bo‘ldi, 60 dan ko‘proq odam jarohat oldi, deb ma'lum qildi BLU Radio radiostansiyasi.

"Mokoa shahri shifoxonasida 60 dan 65 gacha jarohatlangan qolmoqda", deb aytdi tabiiy fojialar oqibatlariga qarshi kurash milliy agentligi rahbari Karlos Ivan Markes.  Uning aytishicha, tabiiy ofat shaharning 17 tumaniga ta'sir qilgan. Ma'lum qilinishicha, o‘nlab odamlar bedarak yo‘qolgan.

OAV ma'lumotlariga ko‘ra, voqeaga hududda bir necha soat davom etgan kuchli yomg‘ir sabab bo‘lgan. Bu Sangoyako va Mulato daryolarining o‘zanlaridan chiqishiga olib kelgan. Radiostansiyaning xabar berishicha, fojia joyiga mamlakat prezidenti Xuan Manuel Santos kelishi kutilmoqda.