Deputat tashabbusi bilan qamashilik maktab o‘quvchilari uchun transport qatnovi yo‘lga qo‘yiladi

Oliy Majlis Qonunchilik palatasidagi “Adolat” SDP fraksiyasi a'zolari Jamshid Pirmatov va Abdug‘ani Umirovlarning Qamashi tumani aholisi bilan o‘tkazgan ochiq muloqotlari g‘oyatda samarali bo‘ldi, deb xabar bermoqda Oliy Majlis Qonunchilik palatasi matbuot xizmati.

Gulshan mahalla fuqarolar yig‘iniga qarashli Xo‘ja qishlog‘i aholisi bilan yuzma-yuz muloqotda ham fuqarolardan tushgan 20 dan ortiq savollarga deputatlarimiz tegishlicha tushuntirish berdilar. Xonadonlarda bo‘lib o‘tgan uchrashuvlarda esa ba'zida noxush holatga ham duch kelindi. 

—1-guruh nogironiman, — dedi Sherzod Do‘stmurodov. — Oxirgi ikki yil davomida uyimga salomatlik posbonlari “Ahvoling qanday” deb qadam ranjida qilishgani yo‘q. Tibbiy xizmatga muhtoj bo‘lsamda, ammo menga tibbiy xizmat ko‘rsatish uyoqda tursin, hatto holimdan xabar ham olishmadi.

Shu kuni “Adolat” SDP fraksiyasi a'zolari bu muammoni tuman hokimi bilan birgalikda joyida o‘rganib chiqib, hal etishdi. Sog‘liqni saqlash mutasaddilariga bunday holatlar qayta takrorlanmasligi yuzasidan tegishli ko‘rsatmalar berildi. 

Muloqot davomida deputatlar sa'i-harakati bilan 16-maktabgacha ta'lim muassasasini ta'mirlash uchun tuman moliya bo‘limi tomonidan 30 million so‘m mablag‘ ajratilishi rejaga kiritildi. Shuningdek, 44-maktab o‘qituvchilari va ota-onalarning shikoyatlari asosida ta'lim maskani deputatlarimiz tomonidan o‘rganilganda, haqiqatdan ham binoning tomidan chakki o‘tayotgani aniqlandi. Ushbu masalaga tegishli tashkilotlar mutasaddilari jalb qilinib, ta'mirlash uchun 60 million so‘m mablag‘ tuman moliya bo‘limi tomonidan ajratilishi ta'minlanadigan bo‘ldi. Shu yerda ilm maskanida ta'lim–tarbiya olayotgan o‘quvchilarning ota-onalaridan tushgan yana bir talab deputatlarimiz ishtirokida o‘z yechimini topdi. Uzoq masofadan qatnab o‘qiydigan o‘quvchilar uchun transport qatnovi yo‘lga qo‘yiladigan bo‘ldi. 15-maktabdagi ishlamasdan turgan transformator muammosi ham hal etildi.