Toshkent viloyatining uchta shahri aholisi uch kunga gaz ta'minotisiz qolib ketdi

Chirchiq, Qibray va G‘azalkentning bir qism aholisi magistral gaz quvuridagi jiddiy avariya tufayli uch kunga gazsiz qolib ketdi.

8 aprelda Qibray yaqinidagi magistral gaz quvurida avariya yuz bergan. Shu sababli Toshkent viloyatining uchta shahri gaz ta'minotisiz qoldi. Bu haqdagi ma'lumotni "O‘ztransgaz" AKdagi manba tasdiqlagan.

"Bugun uchinchi kun gazsiz o‘tiribmiz. Kecha non topish muammo bo‘lib qoldi, chunki nonvoyxonalar gazda ishlaydi, gaz esa yo‘q", deb aytdi Chirchiq aholisi.

"Toshkentgaz ta'minoti" UKda ma'lum qilinishicha, mutaxassislar avariyani bartaraf etib, shikastlangan qismni tiklashgan. Gaz Qibray va G‘azalkentga to‘liq yetib borgan, Chirchiqda esa gaz ko‘p qavatli binolarga berilmoqda.

"Kecha Chirchiqning 60 foizi gaz bilan ta'minlangandi. Bugun mutaxassislar ko‘p qavatli uylarda gazni berish bilan shug‘ullanmoqdalar. Bunday uylardan shaharda 900 taga yaqin bor. Chirchiqda gaz ta'minotining to‘liq tiklanishi ertangi kunga kutilmoqda", deb aytdi "Toshkentgaz ta'minoti"ning ekspluatatsiya bo‘limi boshlig‘i Alisher Mirsalikov.

Uning aytishicha, favqulodda vaziyatlarning oldini olish uchun ko‘p qavatli binolarga gaz berish butun tizimning sinchkov tekshirilishini talab qiladi, shu sababli bu jarayon bir necha kun olishi mumkin. Avariyaning sabablari ma'lum qilinmagan.