O‘zbekistonda yangi kon o‘zlashtirilishi boshlandi

Olmaliq kon-metallurgiya kombinati yangi “Dalneye” konini o‘zlashtirishga kirishdi. Bu haqda korxona matbuot xizmati xabar berdi.

Eslatib o‘tamiz, «Dalneye» konini o‘zlashtirish investitsion loyihasi O‘zbekiston Respublikasi Prezidentining 2017 yil 1 martidagi «Dalneye» koni negizida “Olmaliq KMK” AJ” ishlab chiqarish quvvatlarini kengaytirish bo‘yicha chora-tadbirlar to‘g‘risida”gi 2807-son qarori asosida bosqichma-bosqich 2017-2028 yillar davomida amalga oshiriladi.
 
Ushbu loyihani amalga oshirishdan ko‘zlangan maqsad, “Olmaliq KMK” AJning barqaror rivojlanishi, ishlab chiqarish quvvatlarini oshirish va kengaytirish, “Dalneye” konining mis-molibden rudalarini xalqaro standartlarga muvofiq bo‘lgan, energiya samarador va ekologik me'yorlarga javob beradigan zamonaviy texnologiyalar hamda jihozlar majmuasini qo‘llagan holda o‘zlashtirish hisobiga kombinatning xom-ashyo bazasini mustahkamlashdan iboratdir.

Loyihani amalga oshirish ikki bosqichda olib boriladi:

1 bosqich (2017-2021 y.y.) - “Dalneye” konining “Markaziy” kar'yerida ustki qatlamlarni ochish va tog‘-kapital ishlarini bajarish, ishlab chiqarish, transport, energetika va boshqa tegishli infratuzilma obektlarini bunyod etish hamda tog‘-konchilik, transport va boshqa texnikalarni xarid qilish loyihaning birinchi bosqichida amalga oshiriladigan vazifalar asosini tashkil etadi;

2 bosqich (2019–2028 y.y.) - Ustki qatlamlarni ochish va tog‘-kapital ishlarini davom ettirgan holda qayta ishlovchi, eritish, zaruriy va yordamchi obektlar komplekslari bunyod etilib, 23,0 mln. tonnaga teng rudalarni qayta ishlash quvvatlariga chiqish.

Bugungi kunda ushbu nufuzli loyiha ijrosining 1-bosqichi doirasida keng ko‘lamdagi bunyodkorlik ishlari boshlab yuborildi.

Qiymati 1,7 milliard dollarga yaqin bo‘lgan loyiha O‘zbekiston tiklanish va taraqqiyot jamg‘armasi, tijorat banklari kreditlari va OKMK mablag‘lari hisobidan amalga oshiriladi.