19:18 / 17.04.2017
6662

Qirg‘iziston muxolifati prezidentlik saylovi avgustda o‘tkazilishini talab qilmoqda

Qirg‘izistonda muxolifat kuchlari navbatdagi prezidentlik saylovini avgust oyidan kechiktirmasdan o‘tkazish kerak deb hisoblamoqda. Bu haqda mamlakatning sobiq bosh prokurori, "Ota-Makon" partiyasi vakili bo‘lgan parlament deputati Aida Salyanova fikr bildirib o‘tgan.

Qirg‘iziston konstitutsiyasiga ko‘ra, prezident faqat bir marta 6 yil muddatga saylanishi mumkin. Amaldagi prezident Almazbek Atambayev 2011 yilning 1 dekabrida vazifasiga kirishgan. Bundan oldinroq u respublika prezidentligi uchun navbatdagi saylov 2017 yilning 19 noyabrida o‘tkazilishi haqida ma'lum qilgandi.

Muxolifat deputati Atambayevning vakolati 2 dekabr kuni yakunlanishi haqida aytib o‘tgan. "Saylov 19 noyabr kuni o‘tkazilsa, saylov protseduralarini o‘tash uchun 12 kun muddat qoladi. Bu esa juda kam muddat", degan Salyanova.

U 2011 yilgi saylov vaqtida buning uchun 2 oydan ko‘proq muddat bo‘lganini eslab o‘tgan. O‘shanda saylov 30 oktabr kuni o‘tkazilgan, Roza O‘tunbayevaning vakolati esa 31 dekabr kuni tugagandi.

Deputatning fikricha, agar Atambayev 2 dekabrga qadar barcha vakolatlarini topshirmasa, uning davlat rahbari sifatidagi keyingi qarorlari e'tirozlarga sabab bo‘lishi mumkin.

"Ota-Makon" fraksiyasi rahbari Almambet Shikmamatovning aytishicha, konstitutsiyaga ko‘ra ham saylov avgustdayoq o‘tkazilishi kerak. "Qonunga ko‘ra ovozlarni hisoblash uchun 20 kun, yakuniy natijani e'lon qilish uchun esa 3 kun ajratilgan. Bundan tashqari ehtimoliy ikkinchi tur va saylov natijasiga beriladigan ehtimoli shikoyatlar uchun muddat kerak", — degan u.

Muxolifat vakillarining bildirishicha, "Ota Makon" fraksiyalar rahbarlari va parlament spikeriga Jogorku Kenesh (parlament) aprel oyi oxiriga qadar saylov muddatini aniq e'lon qilishi kerakligi bo‘yicha murojaatnoma yo‘llagan.

Top