AQShning sobiq prezidenti Barak Obama 24 aprel kuni Donald Tramp Oq uyni egallaganidan so‘ng ilk marta omma oldida chiqish qildi. Obama Chikago universiteti yoshlari bilan uchrashdi.
Chikago universitetining majlislar zalida demokrat Obamani 6 nafar siyosiy faol talaba, zal to‘la tomoshabin va jurnalistlar kutib turgan edi.
Obama va majlisga taklif etilgan talabalar qulay o‘rindiqlarga o‘tirib, AQShdagi hozirgi siyosiy vaziyat hamda mamlakat istiqboli haqida fikr almashishdi.
Obama o‘zining kirish so‘zidayoq maqsadga o‘ta qoldi. U kelgusida nima bilan shug‘ullanmoqchi ekanini aytdi.
«Men uchun yangi ish joyimda eng muhim bo‘lgan narsa nima? Ishonamanki, eng muhim tashabbuslardan qat'i nazar, men eng asosiy narsani hal qilishni istayman, u ham bo‘lsa, dunyoni mustaqil ravishda o‘zgartira oladigan yangi avlod yetakchilarini yetishtirishdir», — degan sobiq prezident.
Shu bilan birga, Obama Donald Tramp tomonidan qabul qilinayotgan qarorlarni izohlamaslikka qaror qildi. U, shunchaki, AQShda zudlik bilan choralar ko‘rilishi kerak bo‘lgan yo‘nalishlarni sanab o‘tdi: iqtisodiy notenglik, o‘z oldiga qo‘yilgan maqsadlarga yetishish uchun qo‘yilgan cheklovlar, sud tizimi islohoti, iqlim o‘zgarishi va agressiv kayfiyatlarning o‘sishi.
«Bularning barchasi jiddiy, lekin hal qilish mumkin, — degan Obama. — Ushbu muammolarni hal etishga xalaqit qilayotgan yoki to‘xtatayotgan jarayonlarni siyosiy hayot va fuqarolik jamiyatida qidirish kerak». Uning fikricha, Amerika hokimiyati manfaatlar to‘qnashuvi va shaxsiy orzu-istaklardan voz kecha olmayapti. Bu esa davlatning umumiy maqsadlar yo‘lida ishlashiga to‘siq bo‘lmoqda.
Chikago universitetida chiqish qilgan Obama u bilan hisoblashish zarur bo‘lgan muhim shaxs ekanini namoyish etdi. Politico jurnalining saytida olib borilgan jonli efir chog‘ida Obama chiqishiga 6 mingdan ortiq “yoqdi” tugmasi bosilgan bo‘lsa, 300 mingdan ortiq kishi bevosita tomosha qilgan. Trampning jonli efirlarini esa, ijtimoiy tarmoqlarda 100 mingdan ortiq kishi ko‘rmaydi.
Obama, shuningdek, ijtimoiy tarmoqlar xususida keskin fikrlarini bildirdi.
«Bu siyosat, jamiyat va OAVning birgalikdagi muammosidir. Odamlar boshqa narsani eshitishni xohlashmaydi. Ular faqat to‘g‘ri deb hisoblagan narsani tinglashni xohlaydi, — degan sobiq prezident. — Ular esa, buning o‘rniga, faqat Fox News yoki CNN, yoxud mushuklar olingan videoni ko‘rishadi».
Garchi, Obama bayonoti hazilomuz bo‘lsa-da, siyosiy texnologiyalarni qabul qilishdagi fikri o‘zgarganini bildiradi. U 10 yil muqaddam aynan internet-texnologiyalar uni prezidentlikka olib kelganini unutgan ko‘rinadi. 2008 yili aynan ijtimoiy tarmoqlar, siyosatchining saylovoldi kampaniyasida asosiy rol o‘ynagandi. Obama Twitter va Facebook tarmoqlaridan faol foydalanish natijasida ozodlik va adolatni ilgari surayotgan siyosiy yulduzga aylangandi.
Endilikda, ijtimoiy tarmoqlar Demokratik partiyaning asosiy maydoni hisoblanmaydi, shunga ko‘ra, internetning siyosiy ta'sir jihatidan keng qamrovli ekani Obamani ham xavotirga solayotganga o‘xshaydi.
Sobiq prezident ma'ruzasini yakunlar ekan, yengil giyohvand moddalarni iste'mol qilmaslikni hamda haddan ortiq ko‘p selfiga tushmaslikni maslahat berdi.
