Turkiyada dunyodagi eng yirik internet-ensiklopediya «Vikipediya»ga kirish cheklab qo‘yildi. Bu haqda Hurriyet xabar bergan.
Ta'kidlanishicha, turk hukumati saytga kirish nima sababdan to‘sib qo‘yilganiga oydinlik kiritmagan. Shuningdek, bu cheklov qancha vaqt davom etishi ham noma'lum.
Avvalroq, «Vikipediya» Turkiyadagi referendumdan so‘ng Erdo‘g‘anni «diktator» deb nomlab qo‘ygani haqida xabarlar tarqagandi.
Eslatib o‘tamiz, 16 aprel kuni Turkiyada boshqaruvning prezidentlik shakliga o‘tish bo‘yicha konstitutsiyaviy referendum bo‘lib o‘tdi. Uning natijalariga ko‘ra, turkiyalik fuqarolarning 51,2 foizi hukmron Adolat va rivojlanish partiyasi tomonidan taklif etilgan hamda prezident Rajab Toyyib Erdo‘g‘an tomonidan tasdiqlangan Konstitutsiyaga kiritiladigan o‘zgarishlarni qo‘llab-quvvatladi.
