AQShning General Electric (GE) kompaniyasi AQSh prezidenti Donald Trampning Saudiya Arabistoniga tashrifi vaqtida ushbu mamlakat bilan 15 mlrd dollarlik bitim tuzdi. Bu haqda "Ajil" elektron nashri ma'lum qildi.
Nashr ma'lumotlariga ko‘ra, shartnoma imzolanishi Saudiya Arabistonining Investitsiyalar bo‘yicha bosh boshqarmasining qirollikda 19 ta AQSh kompaniyasining ishlashiga ruxsat berilishi qarori doirasida bo‘lib o‘tdi. Ta'kidlanishicha, bu kompaniyalar Saudiya Arabistoni iqtisodiyotiga, jumladan, bank, aloqa, elektron texnologiyalar, logistika, qurilish, farmatsevtika sohalarida ishlovchi kompaniyalarga qo‘shimcha daromad keltirishi mumkin.
Kutilishicha, Trampning Ar-Riyodga tashrifi vaqtida tomonlar neft sohasidagi hamkorlik haqida 22 mlrd dollarlik shartnoma imzolashadi.
Shuningdek, investitsion sohada hamkorlik haqidagi kelishuvlar imzolanishi kutilmoqda. Unga ko‘ra, qirollik AQSh infratuzilmasi rivojlanishiga 40 mlrd dollarlik sarmoya kiritadi.
O‘tgan yil yakunlariga ko‘ra, AQSh va Saudiya Arabistoni o‘rtasidagi savdo aylanmasi 142 mlrd dollarga yaqinni tashkil qilgan. AQSh Saudiya Arabistoniga eksport amalga oshiruvchi davlatlar orasida 1-o‘rinni egallaydi.
