Indoneziya poytaxti Jakarta sharqida sodir bo‘lgan ikkita portlashda uch nafar politsiyachi halok bo‘ldi. 10 nafarga yaqin kishi jarohatlangan.
Portlash bir necha daqiqa farq bilan mamlakat poytaxtining sharqiy qismida joylashgan avtovokzalda sodir bo‘lgan.
“Britaniyaning Manchester shahrida portlash bo‘ldi. IShID terrorchilari qo‘shnimiz Filippindagi Maravi shahrida terakt uyushtirdi. Bu terakt butun dunyo bo‘ylab terrorchilik to‘lqinining yangi xurujidir”, - dedi Indoneziya politsiyasi vakili Irdjyen Seto Vasisto BBCga intervyu berar ekan.
Uning so‘zlariga ko‘ra, politsiyada yaqin vaqt ichida amalga oshirishi rejalashtirilgan teraktlar haqida ma'lumot bor. Ammo u qachon va qayerda amalga oshirilishi noma'lumligicha qolmoqda.
Terakt guvohlaridan biri, Eka ismli shaxsning aytishicha, portlash huddi zilzila kabi qattiq bo‘lgan.
Xalqaro tinchlikni saqlash institutining ijrochi direktori Bapak Taufik Andrining fikricha, ushbu terakt mamlakat politsiyasidan o‘ch olish maqsadida amalga oshirilgan.
