Qozog‘istonda dovul vaqtida ikki kishi halok bo‘ldi

Qozog‘istonning Taraz shahrida dovul vaqtida ikki kishi halok bo‘ldi. Bu haqda "Kazinform" axborot agentligi ma'lum qildi. 

Ta'kidlanishicha, ikki ishchi uy qurilishi maydonchasida halok bo‘lgan.  

"Ishchilar dovul vaqtida shamol bostirmadan shiferni uchirib tashlayotganda, uni qoqib qo‘ygani tepaga ko‘tarilishgan. Shamol ularni tomdan itqitib yuborgan", deb ma'lum qilindi xabarda. 

Axborot agentligi ma'lumotlariga ko‘ra, Tarazda shamol tezligi 18 m/soniyani tashkil qilgan, ba'zida 27 m/soniyagacha yetgan.

Eslatib o‘tamiz, 29 may kuni Moskvada ham vayronkor dovul kuzatildi. Uning oqibatida 13 kishi halok bo‘lgan, 100 dan ortiq odam jarohat olgan. Ko‘plab daraxtlar ildizi bilan qo‘porilib tashlangan, binolarning tomlariga shikast yetgan.