Yamaykada «Melissa» Nyu-Houp yaqinida quruqlikka chiqib, orol tarixidagi eng kuchli dovul sifatida qayd etildi, kuchli yomg‘ir va shamollar, katta suv toshqinlari yo‘l va uy-joylarga zarar yetkazdi.
Yamaykadan so‘ng dovul Sharqiy Kubaga 3-xavf toifasida kirib bordi, Baham orollari orqali shimolga o‘tib, 31 oktyabr kuni, AQShning Mayami shahri (Florida)da joylashgan Milliy dovullar markazi - NHC (National Hurricane Center )ga ko‘ra, «qudratli post-tropik siklon»ga aylandi (so‘nggi rasmiy byulleten).
Qurbonlar bo‘yicha ro‘yxatlar yangilanmoqda, ammo 31 oktyabr — 1 noyabr holatiga ko‘ra Karib havzasi bo‘ylab kamida 49–50 kishi halok bo‘lgani xabar qilingan (asosan Haitida suv toshqinlari oqibatida).
Iqtisodiy yo‘qotishlar yuzasidan AccuWeather va soha nashrlari umumiy zararni 48–52 mlrd dollar atrofida baholamoqda.
Yamaykaning janubi-g‘arbida ayrim aholi punktlari tashqi dunyodan uzilgan, katta elektr uzilishlari, uy-joylar, yo‘llar va ijtimoiy obektlar zarar ko‘rdi.
Sinoptiklarning ta’kidlashicha, Karib dengizidagi odatdan issiq suvlar dovulning tez kuchayishiga (rapid intensification) sharoit yaratdi. Melissa 5-xavf toifasigacha ko‘tarilib, Atlantika tarixidagi eng kuchli quruqlikka yopirilgan dovullar safiga qo‘shildi.
NHC ma’lumotida «Melissa» shimoliy Atlantikada post-tropik siklon sifatida harakatlanayotgani aytiladi. Karib havzasi davlatlarida esa qutqaruv ishlari, elektr tarmoqlarini tiklash va gumanitar yordam ko‘lami kengaymoqda.
