Fotojamlanma: Venesuelada namoyishchilar o‘ldirilmoqda va hibsga olinmoqda

Venesuela politsiyasi ikki oy oldin boshlangan va hamon davom etayotgan hukumatga qarshi namoyishlar davomida deyarli uch ming kishini hibs qilgan. Bu haqda huquq himoyachilariga asoslangan holda mahalliy nashrlar yozmoqda.

Foro Penal nodavlat tashkiloti rahbari Alfredo Romero bergan ma'lumotga ko‘ra, namoyishlar davomida politsiya 2 ming 977 kishini qo‘lga olgan, ulardan 1,351 nafari hamon hibsda qolmoqda.

Shu kunlarda yana Karakasdagi namoyishlarga ikki mingga yaqin kishi chiqqan. Politsiya ularga qarshi ko‘zdan yosh sizdiruvchi gaz qo‘lladi.

Venesueladagi ommaviy norozilik  namoyishlari shu yilning 1 aprelida prezident Nikolas Maduroni qo‘llab-quvvatlovchi Venesuela Oliy sudi Milliy assambleya (parlament) o‘rniga o‘zini qonunchilik organi deb e'lon qilib, deputatlarni immunitetdan mahrum etish haqida qaror chiqarganidan keyin boshlangandi.

Namoyishchilar navbatdan tashqari prezidentlik saylovlari o‘tkazishni va parlament vakolatlarini tiklab, iqtisodiy islohotlar jarayonini boshlashni talab etmoqda.

Prezident Nikolas Maduro qonunlarni inkor etishda, shuningdek, siyosiy muxolifatga bosim o‘tkazish hamda mamlakatdagi iqtisodiy muammolar yuzaga kelishida ayblanmoqda.

O‘tgan vaqt ichida politsiya bilan to‘qnashuvlar davomida 69 kishi kishi halok bo‘ldi.

Namoyishchilarni tarqatishda o‘tochar qurollardan va rezina o‘qlardan ham foydalanilmoqda. Namoyishchilar esa politsiyaga toshlar va butilkalar uloqtirmoqda, ko‘chalarda mashinalarga o‘t qo‘ymoqda.