Venesuelada zilzila qurbonlari soni 1700 nafardan oshdi

Venesuela Milliy assambleyasi raisi Xorxe Rodriges dushanba, 29 iyun kuni televideniye orqali qilgan chiqishida zilzila oqibatlari haqidagi so‘nggi ma’lumotlarni e’lon qildi. Uning aytishicha, tabiiy ofat natijasida 15 866 kishi boshpanasiz qolgan.

Avvalroq zilzilalar qurbonlari soni kamida 1450 nafar ekani xabar qilingan edi. Biroq qutqaruv ishlari davom etayotgani va o‘n minglab odamlar bedarak yo‘qolganlar ro‘yxatida qolayotgani sababli qurbonlar soni yana oshishi mumkinligi aytilmoqda.

Fojia 24 iyun kuni Venesuela shimolida, poytaxt Karakasdan g‘arbda sodir bo‘lgan. Hududda atigi 39 soniya farq bilan magnitudasi 7,2 va 7,5 bo‘lgan ikki kuchli zilzila qayd etilgan. Mutaxassislar buni mamlakatda so‘nggi 125 yilda kuzatilgan eng kuchli seysmik hodisalardan biri sifatida baholamoqda.

Asosiy silkinishlardan keyin o‘nlab aftershoklar ham ro‘y bergan. Zilzila oqibatida ko‘plab turar joy binolari va infratuzilma obektlari vayron bo‘lgan. Ayniqsa, xalqaro aeroport va mamlakatning eng yirik dengiz porti joylashgan La-Guayra shtati jiddiy zarar ko‘rgan.

Zilziladan keyin Venesuelada favqulodda holat e’lon qilindi. Qutqaruvchilar vayronalar ostida qolganlarni izlash ishlarini davom ettirmoqda. Bedarak yo‘qolganlar soni yuqoriligi sababli mamlakatda vaziyat og‘irligicha qolmoqda.

AQSh Milliy sunami haqida ogohlantirish markazi ma’lumotiga ko‘ra, Venesuelada “seysmik duplet” deb ataladigan hodisa yuz bergan. Bunday holatda bir hududda juda qisqa vaqt oralig‘ida katta magnitudali ikki zilzila sodir bo‘ladi.