AQSh vitse-prezidenti Rossiya va Eronni dunyoga eng katta xavf soluvchi mamlakatlar deb atadi

AQSh vitse-prezidenti Maykl Pens Rossiya va Eron hamda terrorizmni dunyoning eng katta tahdidlari, deb atadi. Ular bilan kurashda AQSh o‘zining NATOdagi ittifoqdoshlariga yordam beradi. Bu haqida u Atlantic Council tahlil markazida so‘zlagan nutqida ma'lum qildi. 

"Rossiyaning xalqaro chegaralarni kuch bilan yopish yo‘lidagi harakatlari va Eronning Yaqin Sharqdagi vaziyatni beqarorlashtirishga bo‘lgan urinishlari, shuningdek istalgan vaqtda har qanday nuqtada zarba berishi mumkin bo‘lgan terrorizmning global tahdidi chorak asr ilgari kommunizmning qulashidan keyingi eng xavfli vaziyatdek tuyuladi", - dedi Pens. 

U AQSh NATO oldidagi ittifoqdoshlik majburiyatlarini bajarish va "bir a'zoga (NATOning a'zosiga) hujum - hammaga hujum tamoyili bo‘yicha harakat qilish"ga tayyor ekanini ta'kidladi. Uning so‘zlariga ko‘ra, NATO yangi va eski raqiblarning paydo bo‘lishni inobatga olgan holda, "bugungi va ertangi kun tahdidlariga, ayniqsa terrorizm tahdidiga qarshi kurashish uchun" rivojlanishda davom etishi kerak.