Harbiy taktik mashg‘ulotlar vaqtida Qora dengizga harbiy vertolyot quladi

9 iyun kuni Bolgariya sohillari yaqinida Qora dengizga "Panter" vertolyoti "Qora dengiz-2017" harbiy taktik mashg‘ulotlari vaqtida quladi. Bu haqda Novini.bg nashri xabar bermoqda. 

Vertolyot dengizga soat 12:30da "nishon sirtiga artilleriya o‘t ochish" topshirig‘i bajarilgandan keyingi manyovrdan keyin qulagan. Vertolyot ekipaji darhol suvdan chiqarib olingan. 

Boshlang‘ich tibbiy ekspertizadagi ma'lumotlarga ko‘ra, ekipaj sardori Georgiy Atanasov og‘ir jarohatlar olgan va og‘ir ahvolda. Ekipajning qolgan a'zolari – kapitanlar Pavel Simeonov va Anatoliy Apostolovning ahvollari barqaror, deya ma'lum qilingan.

Jarohatlangan askarlar Varnadagi harbiy gospitalga yetkazilganlar, ularning yaqinlari bo‘lib o‘tgan voqeadan xabardor qilinganlar. Ayni vaqtda voqea sabablari aniqlashtirilmoqda.