Argentinada maktab avtobusi ishtirokida jiddiy YTH, 10 dan ortiq odam halok bo‘ldi

Argentinaning Mendosa viloyatida avtobus ishtirokida YTH ro‘y berdi. Todo Noticias’ning xabar berishicha, avtobusda raqs maktabi o‘quvchilari bo‘lgan.

Nashr ma'lumotiga ko‘ra, avtobus salonida Buenos-Ayresdagi raqs maktabida tahsil oluvchi bolalar guruhi va ularning ota-onalari bo‘lgan.

Hodisa oqibatida 12 kishi, jumladan bolalar ham, halok bo‘ldi, o‘nlab insonlar jarohatlandi.

Politsiya avtohalokat sababini ochiqlamagan. Ta'kidlanishicha, qurbonlar soni ortishi mumkin.

Avvalroq Braziliyada yuk mashinasi, avtobus va ikkita tez tibbiy yordam mashinasi ishtirokidagi yo‘l-transport hodisasida kamida 21 kishi halok bo‘lgani haqida xabar berilgandi.