Madhiyani astoydil aytmaydigan filippinliklarga jarima solinadi

Mamlakat madhiyasini yetarlicha his-tuyg‘u bilan aytmaydigan filippinliklar jarimaga tortilishlari mumkin. Yangi qonun loyihasiga ko‘ra, madhiyani har bir fuqaro astoydil ayta olishi kerak. Aks holda aybdorlar 2 ming dollarlik jarimaga tortilishlari mumkin, deb xabar bermoqda Inquirer.

Madhiya ijro etilayotganda barcha tik turgan holda bayroqqa yoki dirijyorga yuzi bilan qarab turishi kerak. Madhiyani diniy e'tiqodiga ko‘ra ayta olmaydiganlar bundan mustasnolar, biroq ular ham madhiya ijrosi vaqtida tik turishlari kerak.

Filippinda madhiya kinoteatrlarda filmlar ijrosi oldidan, teleeshittirish boshlanganda va nihoyalaganda hamda boshqa ko‘plab holatlarda ijro etiladi.

Filippin milliy madhiya bilan bog‘liq qat'iy qoidalarni o‘rnatgan yagona davlat emas. O‘tgan yil Hindistonda barcha kinoteatrlarga madhiya ijro etilishi buyurilgan. Madhiya ijrosi vaqtida hamma o‘rnidan turib uni tinglashi shart qilib qo‘yilgan.