Turkiya parlamenti mamlakatdagi favqulodda holatni yana uzaytirdi

Turkiya jumhuriyati parlamenti 17 iyul kuni to‘rtinchi marotaba mamlakatdagi favqulodda holat tartibini 90 kunga uzaytirdi. Bu tartib davlat to‘ntarishiga harbiy urinishdan so‘ng joriy qilingan edi, deb yozmoqda Hürriyet Daily News.

Mamlakat hukumati FH tartibini uzaytirish zaruratini terrorchilik tahdidlariga qarshi kurash bilan izohlamoqda. Nashrning qayd etishicha, gap AQShda yashiringan Fathulloh Gulen yetakchiligidagi FeTO tashkiloti haqida bormoqda. 

17 iyul kuni Turkiya hukumati parlamentga favqulodda holat tartibini uzaytirish so‘rovini yuborgan edi. Ta'kidlanishicha, parlament qarori hukmron Adolat va taraqqiyot partiyasi deputatlari qo‘llab-quvvatlashi asosida qabul qilingan. 

Turkiyada FH tartibi ilk marotaba 2016 yil 21 iyulda, harbiy isyondan 6 kun o‘tib  joriy etilgan edi.