Turkiya va Isroil prezidentlari Al-Qudsdagi keskin vaziyatni muhokama qilishdi

Turkiya prezidenti Rajab Toyyib Erdo‘g‘an Isroil prezidenti Reuven Rivlin bilan Al-Qudsdagi Al-Aqsa masjidi bilan bog‘liq keskin vaziyatni telefon orqali muhokama qildi, deb xabar bermoqda “Anadolu” Turkiya davlat rahbari ma'muriyatidagi manbalarga asosan.

Turkiya prezidenti 14 iyul kuni Al-Qudsda ro‘y bergan va insonlarning halok bo‘lishiga sabab bo‘lgan hodisalardan tashvishda ekanini bildirdi.

Erdo‘g‘anning ta'kidlashicha, zo‘ravonlik holatlariga yo‘l qo‘ymaslik, diniy obektlarning muqaddasligi va tarixiy maqomiga hurmat ruhini saqlab qolish lozim.

Turkiya rahbarining so‘zlariga ko‘ra, Al-Quds masjidi hududiga kirmoqchi bo‘lgan musulmonlarga nisbatan qo‘llangan cheklovlarni qabul qilib bo‘lmaydi va ushbu masala din erkinligi doirasida hal etilishi lozim.

Turkiya prezidenti “Al-Aqsa” masjidining musulmonlar uchun alohida ahamiyatga ega ekanligini ko‘rsatib, isroillik askarlar masjidga kiraverishda metall buyumlarni qidirish qurilmalaridan foydalanishni bas qilishlari lozimligini qayd etgan.

Isroil prezidenti Rivlinning bunga javoban ta'kidlashicha, ushbu choralar xavfsizlik maqsadida ko‘rilgan bo‘lib, masjidning maqomi avvalgidek qoladi, din erkinligi esa cheklanmaydi.

Avvalroq Rajab Toyyib Erdo‘g‘an falastinlik hamkasbi Mahmud Abbos bilan telefon orqali muloqotda Isroilning Falastin aholisiga nisbatan huquqbuzarliklarini muhokama qilgani xabar berilgandi.