Meyvezer Makgregorga qarshi jangidan keyin faoliyatini yakunlashga va'da berdi

Amerikalik mashhur bokschi Floyd Meyvezer o‘z jamoasi va farzandlariga UFC chempioni Konor Makgregorga qarshi jangidan keyin faoliyatini davom ettirmaslikka so‘z berdi. Bu haqda RT xabar bermoqda.   
 
“Bu mening oxirgi jangim. Men jamoam va farzandlarimga Makgregor bilan jangdan keyin boshqa ringga ko‘tarilmaslikka so‘z berdim. Men va'damda turaman va uni buzmayman. Menda ko‘p ishlar paydo bo‘ldi, farzandlarim kollejga borishadi va bu ko‘p vaqt oladi, chunki ta'lim mening oilamda muhim ahamiyatga ega.

Men 10, 5 yoki 2 yil avvalgi Floyd Meyvezer emasman, men 21 yoshdamasman. Biroq men hamon ringda xavfliman. Men ringga ko‘tariladigan ko‘p hollarda menga tajribam yordam beradi, chunki men ko‘plab eng yuqori darajadagi janglar o‘tkazganman”, deb aytgan 40 yoshli bokschi.

Avvalroq bokschi agar Makgregor jang vaqtida unga oyoq bilan zarba bersa, gonorarining 90 foizini yo‘qotishini aytgandi. 

Anchadan beri kutilayotgan ushbu jangga ham sanoqli kunlar qoldi. U 26 avgustda Las-Vegasda bo‘lib o‘tadi.

Avvalroq Meyvezer boks haqidagi nufuzli nashrlardan biri tuzgan reytingga ko‘ra, barcha zamonlarning eng yaxshi bokschisi deb topilgandi.