KUN.UZ tahririyati “Xalq bilan muloqot va inson manfaatlari yili” doirasida vazirliklar rahbarlari, viloyatlar, tuman va shaharlar hokimlari bilan ochiq suhbat uyushtirishda davom etmoqda. Navbatdagi ochiq muloqot Namangan shahri hokimi Shavkat Abdurazzoqov bilan o‘tkazildi. Suhbat davomida hokim qator dolzarb masalalar bo‘yicha o‘z fikrlari bilan o‘rtoqlashdi.
Hokim sifatida ishlash qiyinmi?
Shahar hokimi sifatida saylanganimga bir oydan ortiq vaqt o‘tdi. Bu savolga ikkita javob bor: ham qiyin, ham oson. Qiyinligi – ko‘plab muammolar bor. Ularni qaysidir rahbarlar ko‘tarmasdan, qandaydir darajada berkitib kelinganlari ham ko‘p. Lekin, mana, yangi davrga o‘tayapmiz, desak to‘g‘ri bo‘ladi. Muhtaram Prezidentimiz ko‘p sohalarda islohotlarni amalga oshirmoqda. Shu nuqtai nazardan qaraydigan bo‘lsak, bugungi kunda fuqarolar bilan ishlash, muammolarga tik boqish va ularni hal qilish masalasi oldimizga vazifa qilib qo‘yilgan. Shaharda muammo juda ham ko‘p. Ichimlik suvi ta'minoti, ichki yo‘llar masalasida yillar davomida to‘plangan muammolar bor. Qolaversa, uy-joy masalasi ham bizda dolzarb ahamiyatga ega. Faoliyatimni boshlaganimdan so‘ng, yer uchastkalarini ajratish masalasi vaqtinchalik to‘xtatildi. Nega? Yer shaharning turli tomonlaridan ajratib beriladi, lekin ertaga uning kommunikatsiyasini mahalliy hokimiyat qilib berishi kerak. 10 ta joyga elektr tortish, gaz, yo‘l qilish og‘ir masala. Shuning uchun Namangan shahar hokimligi saytida murojaatlar ro‘yxati shakllantirilmoqda. Bizda yer uchastkasi eng og‘ir masala.
Yoshlar masalasi
Bu masalada muhtaram Prezidentimizning topshiriqlari ham, mening ham fikrim shundayki: ularga, birinchi navbatda, sharoit qilib berishimiz kerak. Jinoyat ko‘payib ketayapti, yoshlarimiz chetga chiqib ketayapti, degan shiorlar bilan yuradigan paytlar o‘tib ketdi. Nima qilish kerak? Birinchisi - ish o‘rni kerak. Band bo‘lsa, jinoyatchilik bo‘lmaydi. O‘zining ustida ishlash uchun sharoit bo‘lishi kerak va eng asosiysi – yoshlarga hordiq chiqarish uchun sharoit lozim. Bizda hordiq chiqarish, afsuski, yetarli emas. Bir paytlar bizda bouling-klub kabi narsalar bo‘lgan. Hozir bog‘larimiz rivojlanib, ko‘paymoqda, biroq baribir yetarli emas. Bugungi kunda 30 yoshgacha bo‘lgan aholimiz soni 300 mingga yaqin. Agarda unda mazmunli hordiq bo‘lmasa, boshqa taklifga duch kelishi mumkin. Kimdir sigareta chekib ko‘r, boshqa ishni qilib ko‘r, deydi. O‘z-o‘zidan jinoyatchilik kelib chiqadi. Shuning uchun yoshlarni band qilishimiz lozim. Yoshlar ittifoqining tashkil etilgani ham juda katta tashabbus bo‘ldi. Ittifoq shu muammolarni yechishda ijro hokimiyati organlariga ko‘makdosh bo‘ladi, deb o‘ylayman.
