“Dunyo” muxbiri xabar berishicha, Namangan viloyati hokimi Shavkat Abdurazzoqov rahbarligidagi delegatsiya Yaponiyaga tashrifi doirasida bir qator yirik kompaniya va tibbiyot muassasalari rahbarlari bilan uchrashuvlar o‘tkazdi.
Tashrif doirasida delegatsiya Riverfield Inc. kompaniyasi prezidenti Kotaro Tadano bilan muzokaralar o‘tkazib, Namangan viloyatida robot-assistent xirurgiyasi va innovatsion tibbiy uskunalarni joriy etish bo‘yicha kelishuvga erishdi. Loyiha doirasida yuqori aniqlikda operatsiyalar o‘tkazish, zamonaviy robotlashtirilgan xirurgik texnologiyalarni joriy etish hamda tibbiyot xodimlarini o‘qitish rejalashtirilgan.
Shuningdek, delegatsiya Tokushukai Medical Group prezidenti Xigashi Chinichi bilan uchrashuv o‘tkazib, onkologiya, kardioxirurgiya va yuqori texnologiyali tibbiy xizmatlarni Namanganda rivojlantirish bo‘yicha hamkorlik bitimini imzoladi.
Yaponiya bilan hamkorlik natijasida Namangan viloyatida tibbiy xizmatlar sifati va texnologiyalar darajasini yangi bosqichga olib chiqish ko‘zda tutilmoqda.
