«Hizbulloh» AQShni IShID jangarilariga gumanitar yordamni yetkazishga to‘sqinlik qilishda aybladi

Livanning harbiylashgan tashkiloti «Hizbulloh» AQShni uning harbiy samolyotlari evakuatsiya qilinayotgan IShID jangarilari bo‘lgan avtobus konvoylarini to‘xtatganida aybladi. Bu haqda Reuters xabar qilmoqda.

Tashkilotdan ta'kidlashlaricha, AQSh aviatsiyasi avtobus konvoyiga yuborilgan gumanitar yordamga ham to‘sqinlik qilgan.

«Hizbulloh» bayonotiga ko‘ra, avtobuslarda nafaqat IShID jangarilari, balki ularning oila a'zolari, keksa insonlar, yaralanganlar va homilador ayollar ham bor.

Ularning ma'lumotiga qaraganda, konvoyning evakuatsiya qilinayotgan IShID jangarilari bo‘lgan oltita avtobusi Suriya hukumati nazoratida bo‘lgan hududda to‘xtab qolgan. Suriya armiyasi konvoyga erishilgan kelishuvlar doirasida harakatlanishga ruxsat berdi.

IShID jangarilari Livan bilan chegaradagi hududni «Hizbulloh» bilan kelishuv doirasida tark etishdi. Ushbu kelishuv terrorchilarga Iroq bilan chegara yaqinidagi IShID qo‘lida bo‘lgan hududga yetib olish imkonini beradi.

Avvalroq Suriyadagi cho‘lda IShIDning 17 avtobusidan iborat konvoy to‘xtab qolgani xabar berilgandi.