Qirg‘izistonda teraktga tayyorgarlik ko‘rgan IShID a'zosi qo‘lga olindi 

Qirg‘iziston maxsus xizmatlari IShID terrorchilik guruhining terakt sodir etishga tayyorgarlik ko‘rgan a'zosini qo‘lga oldilar, deb xabar bermoqda «Interfaks» mamlakat Davlat milliy xavfsizlik qo‘mitasi matbuot xizmatiga asosan.

Matbuot xizmati ma'lumotiga ko‘ra, 2 sentabr kuni 1998 yilda tug‘ilgan yigit qo‘lga olingan, u davlat tadbirlari vaqtida terakt sodir etishni rejalashtirgan.

Qo‘lga olingan shaxsning yashash joyida o‘tkazilgan tintuv vaqtida portlovchi qurilma qismlari, shuningdek, ekstremistik materiallar topilgan.

Avvalroq Guardian nashri IShID Londonda terakt sodir etish uchun BBC jurnalistini “yollagani” haqida xabar bergandi.