Almazbek Atambayev odamlarni diniy bag‘rikenglikda tarbiyalashga chaqirdi

Odamlarni diniy bag‘rikenglikda tarbiyalash hozirgi davlatlar va umuman insoniyatning asosiy vazifasiga aylanishi kerak. Qirg‘iziston prezidenti Almazbek Atambayev "Islom zamonaviy dunyoviy davlatda" xalqaro konferensiyasida shunday bayonot bilan chiqdi, deya xabar bermoqda 24.kg. 

Uning so‘zlariga ko‘ra, hozirgi diniy shiorlar bilan niqoblanuvchi ekstremizm va terrorizm to‘lqinini milliy davlatlarning mustahkamlanishi, ularning o‘z madaniyati, tili va o‘ziga xosligini saqlab qolish orqali yengib o‘tish mumkin. 

Shu o‘rinda Almazbek Atambayev muqaddas Qur'onda keltirilgan "Baqara" surasi, 256-oyatidagi "dinda majburlash yo‘q" deya qayd etilgani va islom dinida e'tiqod masalasida birovni majburlash yo‘qligini ta'kidladi. 

Islom niqobi ostida boshqa mamlakat musulmonlarining turmush tarzi, urf-odatlari, kiyim-kechak va madaniyatini majburlab targ‘ib qilish haqida-ku gapirmasa ham bo‘ladi, deya ta'kidladi Qirg‘iziston prezidenti.