Kot-d’Ivuar sohillari yaqinida Ukraina samolyoti halokatga uchradi

Ukraina aviakompaniyasining An-26 yuk samolyoti Kot-d’Ivuar poytaxti Abidjan aeroporti yaqinida Atlantika okeani ustida halokatga uchradi. Ta'kidlanishicha, samolyot Burkina-Fasodan uchib kelayotgan bo‘lgan. Samolyot bir necha qismga bo‘linib ketgan, uning bir necha bo‘lagi to‘lqin bilan qirg‘oqqa chiqarib tashlangan. 

Reuters axborot agentligi ma'lumotlariga ko‘ra, samolyot mahalliy vaqt bilan soat 8.30larda aeroport yaqinida okeanga qulagan. 

Ma'lum qilinishicha, falokat oqibatida 4 kishi halok bo‘lgan va 6 kishi jarohat olgan. Barcha qurbonlar Moldova fuqarolari bo‘lgan, jarohatlanganlar orasida 4 nafar fransuz harbiysi ham bor.

Fojiaga samolyotning me'yoridan ortiq yuklangani sabab bo‘lgani taxmin qilinmoqda. Samolyot fransuz harbiylariga anjomlar yetkazib berayotgan bo‘lgan.