Atamboyev Putinni ham mukofotladi

Qirg‘iziston rahbari Almazbek Atamboyev Rossiya prezidenti Vladimir Putinni respublikadagi oliy davlat mukofoti – birinchi darajali "Manas" ordeni bilan mukofotladi. Bu haqda Qirg‘iziston yetakchisi matbuot xizmati xabar bermoqda.

Matbuot xizmati ma'lumotlariga ko‘ra, Atamboyev tegishli farmonni chorshanba kuni imzolagan.

"Almazbek Atamboyev Rossiya prezidenti Vladimir Putinni I darajadagi "Manas" ordeni bilan Qirg‘iziston Respublikasi va Rossiya Federatsiyasi o‘rtasida strategik sheriklikni mustahkamlash hamda ittifoqchilik munosabatlarini rivojlantirishga qo‘shgan hissasi uchun mukofotladi", - deyiladi Qirg‘iziston prezidenti matbuot xizmati xabarida.

"Manas" ordeni Qirg‘izistonning oliy davlat mukofoti sifatida 1996 yilda ta'sis etilgan. U uch darajaga ega bo‘lib, "davlat va demokratik jamiyat himoyasi hamda mustahkamlanishiga, xalq birdamligi, mamlakat iqtisodiy, ma'naviy va intellektual salohiyatini yuksaltirishga qo‘shgan buyuk hissasi uchun" topshiriladi.

O‘z vaqtida I darajali "Manas" ordeni bilan yozuvchi Chingiz Aytmatov, BMT bosh kotibi Kofi Annan hamda boshqalar mukofotlangan.

Eslatib o‘tamiz, avvalroq Almazbek Atamboyev Shavkat Mirziyoyevni orden bilan mukofotlagani xabar berilgandi.