Yana kollej o‘quvchilari. Jizzaxda 5 o‘quvchi o‘z tengdoshlarini kaltakladi

Jizzaxda Mirzacho‘l qishloq xo‘jaligi kasb-hunar kollejining uchinchi bosqich o‘quvchilari Mirzacho‘l agroiqdisodiyot kasb-hunar kollejida o‘qiydigan tengdoshlarini kaltaklashdi. Mirzacho‘l tumanidagi 13-musiqa va san'at maktabida ushbu ma'muriy huquqbuzarlik ishi bo‘yicha sayyor ochiq sud majlisi o‘tkazildi. Bu haqda O‘zA xabar bermoqda.

Sudda ko‘rilgan “hech bir sababsiz” janjalning sababi aslida bunday bo‘lgan: joriy yil 20 sentabr kuni Mirzacho‘l qishloq xo‘jaligi kasb-hunar kollejining uchinchi bosqich o‘quvchilari Dilshod Tursunboyev, Bekjon Xo‘jaahmedov, Naim Xonkelov, Keldiyor Islomov va Otabek Sulaymonov Mirzacho‘l agroiqdisodiyot kasb-hunar kollejida o‘qiydigan tengdoshlari Bobir Azizov va Bekzod Ne'matov bilan “hisob-kitob” qilib qo‘yish uchun ularning yo‘lini to‘sadi. Janjalda, albatta, ko‘pchilik tomon ozchilikni kaltakladi. Janjal ko‘pchilik ozchilikni uyigacha kaltaklab "yetkazib" qo‘yishi bilan yakunlandi. 

Natijada agroiqtisodiyot kasb-hunar kolleji o‘quvchisi Bekzod Ne'matov shifoxonaga tushdi, Mirzacho‘l qishloq xo‘jaligi kasb-hunar kollejining besh nafar o‘quvchisi ma'muriy javobgarlikka tortildi. 

Achinarlisi, o‘quvchilar o‘rtasidagi ixtilof garchi anchadan buyon davom etayotgan bo‘lsa-da, mushtlashuvgacha bu holga na ota-ona, na mahalla va na bilim yurti ma'muriyati e'tibor berdi. Befarqlikning oqibati o‘quvchilardan birining tan jarohati olgani, besh nafarining ustidan ma'muriy huquqbuzarlik ishi qo‘zg‘atilganidan so‘nggina jamoatchilik e'tiborini tortdi.