Samarqandda «112» raqami orqali shoshilinch operativ xizmatlarni chaqirish tizimi tashkil etiladi

O‘zbekiston Respublikasi Vazirlar Mahkamasining «Samarqand shahrida «112» yagona raqami orqali shoshilinch operativ xizmatlarni chaqirish tizimini tashkil qilish to‘g‘risida»gi qarori e'lon qilindi.

O‘zbekiston Respublikasi Prezidentining «Axborot-kommunikatsiya texnologiyalari sohasidagi loyihalarni boshqarish tizimini yanada takomillashtirish chora-tadbirlari to‘g‘risida» 2017 yil 29 avgustdagi PQ-3245-son qaroriga muvofiq, shuningdek, Samarqand shahrida hodisa va favqulodda vaziyatlarga shoshilinch chora ko‘rilishini ta'minlash sohasida axborot tizimlarini joriy etish maqsadida Vazirlar Mahkamasi qaror qildi:

1. O‘zbekiston Respublikasi Axborot texnologiyalari va kommunikatsiyalarini rivojlantirish vazirligining «Xavfsiz shahar» yagona apparat-dasturiy kompleksi loyihasini amalga oshirish doirasida Samarqand shahrida shoshilinch operativ xizmatlarning muqobil telefon raqamlaridan foydalanish imkoniyatini saqlab qolgan holda «112» yagona raqami (keyingi o‘rinlarda - «112» tizimi deb ataladi) orqali shoshilinch operativ xizmatlarni chaqirish tizimini joriy etish tajriba loyihasini amalga oshirish to‘g‘risidagi taklifi ma'qullandi.

2. Quyidagilar «112» tizimini tashkil etishning asosiy yo‘nalishlari etib belgilandi:

Samarqand shahridagi shoshilinch operativ xizmatlarning navbatchi- dispetcherlik bo‘linmalari o‘rtasida yaqindan axborot almashinuvi bo‘yicha mustahkam hamkorlikni ta'minlash;

odamlarning hayoti va sog‘lig‘iga xavf tug‘ilganda, yong‘inlarda, yo‘l-transport hodisalarida, jamoat tartibi buzilganda hamda avariya, baxtsiz hodisalarda va favqulodda vaziyatlarda darhol xabardor qilish va shoshilinch operativ xizmatlarning muvofiqlashtirilgan choralari ko‘rilishini ta'minlash;

baxtsiz hodisalar va favqulodda vaziyatlar ro‘y berganda fuqarolarga konsultativ va psixologik yordam ko‘rsatish, ularning murojaatlarini ko‘rib chiqishda shaffoflikni ta'minlash hamda shoshilinch operativ xizmatlarning o‘z vaqtida chora ko‘rishi yuzasidan tizimli nazorat yuritish.

3. Belgilanishicha, chaqiruv «112» tizimi orqali ta'minlanadigan shoshilinch operativ xizmatlarga quyidagi bo‘linmalar kiradi:

ichki ishlar organlarining yong‘in xavfsizligi xizmatlari;

ichki ishlar organlarining jamoat tartibini saqlash, tartibbuzarliklarni profilaktika qilish va jinoyatlarga qarshi kurashish bo‘linmalari; 

shoshilinch tibbiy yordam xizmatlari;

gaz tarmoqlarining avariya xizmati;

O‘zbekiston Respublikasi Favqulodda vaziyatlar vazirligining qutqaruv xizmatlari.

4. Samarqand shahrining yagona dispetcherlik xizmati (keyingi o‘rinlarda - dispetcherlik xizmati deb ataladi) O‘zbekiston Respublikasi Axborot texnologiyalari va kommunikatsiyalarini rivojlantirish vazirligining Axborot xavfsizligi va jamoat tartibini ta'minlashga ko‘maklashish markazining filiali shaklida Axborot texnologiyalari va kommunikatsiyalarini rivojlantirish vazirligining Axborot- texnologiyalarini rivojlantirish jamg‘armasi mablag‘lari hisobidan moliyalashtiriladigan 22 nafar shtat birligi bilan tashkil etiladi.

O‘zbekiston Respublikasi Axborot texnologiyalari va kommunikatsiyalarini rivojlantirish vaziriga, O‘zbekiston Respublikasi Moliya vazirligi bilan kelishgan xolda, kelib tushayotgan xabarlar va murojaatlarni hisobga olib dispetcherlik xizmatining belgilangan shtatlar soniga o‘zgartirishlar kiritish huquqi berildi.

5. Quyidagilar:

«112» yagona raqami orqali shoshilinch operativ xizmatlarni chaqirish tizimini joriy qilish tajriba loyihasini Samarqand shahrida amalga oshirish bo‘yicha chora-tadbirlar dasturi 1-ilovaga muvofiq;

«112» yagona raqami orqali shoshilinch operativ xizmatlarni chaqirishlarga xizmat ko‘rsatish va ularning idoralararo o‘zaro hamkorlik qilish sxemasi chizmalari 2 va 3-ilovalarga muvofiq tasdiqlandi.

6. Belgilanishicha, kelib tushayotgan xabarlarni saqlash va ularni ishlash, shoshilinch operativ xizmat chaqiruvlari to‘g‘risidagi ma'lumotlarni qayd etish, shuningdek, ular o‘rtasidagi idoralararo hamkorlikni ta'minlash bo‘yicha «112» tizimi faoliyati Samarqand shahridagi «O‘zbektelekom» AKning texnik uskunalari bazasida, «112» tizimining kichik tizimlari faoliyati esa - har bir shoshilinch operativ xizmatlarning texnik uskunalari bazasida tashkil etiladi.

7. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi Ichki ishlar vazirligi. Sog‘liqni saqlash vazirligi, Favqulodda vaziyatlar vazirligi va «O‘ztransgaz» AJ bilan birgalikda:

ikki hafta muddatda - Samarqand shahrida «112» tizimi faoliyatini tashkil etish bo‘yicha aniq vazifalar biriktirilgan va faoliyati tartibini belgilagan holda idoralararo ishchi guruh tashkil qiladi;

ikki oy muddatda - «112» yagona raqami orqali shoshilinch operativ xizmatlar chaqirilishini ta'minlash tizimi to‘g‘risidagi Nizomning tasdiqlanishini nazarda tutuvchi Hukumat qarori loyihasini ishlab chiqadi va O‘zbekiston Respublikasi Vazirlar Mahkamasiga kiritadi.

8. O‘zbekiston Respublikasi Ichki ishlar vazirligi. Sog‘liqni saqlash vazirligi, Favqulodda vaziyatlar vazirligi va «O‘ztransgaz» AJ rahbarlari zimmasiga quyidagilar yuzasidan shaxsan javobgarlik yuklandi:

«112» tizimini joriy etish mobaynida xabarlarni, shu jumladan elektron tarzdagi xabarlarni qabul qilish va ularni ishlash jarayonlarini avtomatlashtirish;

o‘z axborot-kommunikatsiya resurslarini «112» yagona tizimi bilan samarali integratsiyalash;

shoshilinch operativ xizmatlar navbatchi-dispetcherlik bo‘linmalarining «112» tizimi bilan mustahkam hamkorlik qilishini amalga oshirish.

9. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi:

bir oy muddatda - Samarqand shahrining yagona dispetcherlik xizmati tuzilmasi uning aniq vazifalari va funksional majburiyatlarini belgilagan holda tasdiqlaydi;

uch oy muddatda - Samarqand shahri yagona dispetcherlik xizmatining to‘laqonli faoliyatini ta'minlash uchun, faoliyatining xususiyatini hisobga olgan holda, uni joylashtirish, jihozlash va boshqa tashkiliy masalalarni hal qilish choralarini ko‘radi;

O‘zbekiston Respublikasi Ichki ishlar vazirligi, Sog‘liqni saqlash vazirligi, Favqulodda vaziyatlar vazirligi va «O‘ztransgaz» AJga normativ va loyiha-texnik hujjatlarni ishlab chiqishda hamda Samarqand shahrining shoshilinch operativ xizmatlarining navbatchi-dispetcherlik bo‘linmalarini zarur moddiy-texnik baza bilan ta'minlashda, shuningdek, ularning yaqindan hamkorlik qilishida va «112» tizimini joriy etish loyihasining amalga oshirilishi doirasida xodimlarni o‘qitishda amaliy yordam ko‘rsatadi;

2018 yil yakunlari bo‘yicha «112» tizimi tajribasini, uning Samarqand shahridagi faoliyati tahlilini hisobga olgan holda, kelgusida respublikaning boshqa mintaqalarida ham qo‘llash to‘g‘risida takliflar kiritadi.

10. Belgilanishicha, ushbu qarorning ijrosi bilan bog‘liq xarajatlar Axborot texnologiyalari va kommunikatsiyalarini rivojlantirish vazirligining Axborot-kommunikatsiya texnologiyalarini rivojlantirish jamg‘armasi mablag‘lari hamda qonunchilikda taqiqlanmagan boshqa manbalar hisobiga amalga oshiriladi.

11. O‘zbekiston Respublikasi Bosh prokuraturasiga «112» tizimiga kelib tushayotgan xabarlar uning o‘z vaqtida qabul qilinishi va ularning bajarilishi yuzasidan tegishli qonun buzilishlari aniqlangan holatlarda qonunchilikda nazarda tutilgan choralar ko‘rish, ularning monitoringini olib borish tavsiya etildi.

12. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari - «O‘zbekiston temir yo‘llari» AJ boshqaruvi raisi A.J.Ramatov hamda O‘zbekiston Respublikasi Axborot texnologiyalari va kommunikatsiyalarini rivojlantirish vaziri vazifasini bajaruvchi Sh.X.Shermatov zimmasiga yuklandi.