Budapeshtda taxminan 2 milliondan ortiq aholi yashaydi, bu uni Yevropa Ittifoqidagi yirik shaharlardan biriga aylantiradi. Budapesht Vengriyaning iqtisodiy-madaniy markazi hisoblanadi. Bu yerda mamlakatdagi yetakchi yirik kompaniyalar, banklar va moliyaviy muassasalar joylashgan. Ammo aholining asosiy qismi madaniyat, san’at va iqtisodiyotga katta e’tibor beradi va faoliyat yuritadi. Balki shuning uchun ham bu shahar mehmonlarda iliq xotiralar bilan yodda qoladi.
To‘rt faslda sizni nima kutadi?
Shaharda teatrlar, konsert zallari, muzeylar va galereyalar soni juda ko‘p. Aholi bir necha turli madaniyatlar, an’analar va tillar bilan tanish. O‘z madaniyatini yuqori darajada namoyon eta oladigan vengerlar bundan ustalik bilan foydalanishadi. Yilning to‘rt faslida ham xushchaqchaq kayfiyatni taqdim eta oladigan tadbirlar ularning jon-u dili. Qishda ham u yerda zerikib qolmaslik aniq, chunki dekabrda rojdestvo munosabati bilan mahalliy hunarmandchilik, an’anaviy taomlar va suvinerlar ko‘rgazmalari boshlanadi. Mahalliy madaniyatni his qilish uchun bu yaxshi imkoniyat.
Budapeshtda bahorning kelishini har yili mart-aprel oylarida o‘tkaziladigan bahor festivali (Budapest Spring Festival) ochib beradi. Bu Vengriyaning eng yirik va qadimiy madaniy festivallaridan biri bo‘lib, 1981 yilda tashkil etilgan va madaniyatning barcha yo‘nalishlarini qamrab oladi. Festival Vengriya poytaxti Budapeshtda o‘tkazilib, dunyo miqyosida mashhur madaniy tadbirlardan biriga aylangan. Mayda esa Budapesht xalqaro gastronomik festivali boshlanadi. Unda sayyohlar mahalliy va xalqaro taomlarning turfa xilini tatib ko‘rishlari mumkin.
Yozda esa shahar ko‘chalarida ko‘chma san’at festivali o‘tkaziladi, bu sayyohlarga san’at va madaniyatni yaqindan his qilish imkonini beradi. Musiqa shinavandalari bu musiqa festivallarini yaxshi bilishadi va har yili bu mavsumda dunyoning turli mamlakatlaridan sayyohlar oqimi Budapeshtga qarab yo‘naladi.
