Sud Argentina sobiq prezidentini qo‘lga olish qarorini tasdiqladi

Argentina sudi senator va sobiq prezident Kristina Fernandes de Kirshner advokatlarining 1994 yilda Buenos-Ayresdagi yahudiy madaniyat markazidagi portlashni tergov qilishga to‘sqinlik qilish ayblovlari bilan bog‘liq sudgacha qamoqda ushlab turilishiga doir qaror appelyatsiyasini rad etdi. Payshanba kuni Sud axborot markazi saytida shunday mazmundagi qaror taqdim etildi. 

"Kristina Fernandes de Kirshnerning hibsga olinishiga doir qaror qo‘llab-quvvatlansin, uning ijro etilishi sudya [Klaudio Bonadio] talab qilgan parlament imtiyozlaridan mahrum etish jarayonining natijalariga bog‘liq", - deyiladi hujjatda. 

Shu bilan birga, yuqori instansiya sobiq prezidentga nisbatan ilgari surilgan "vatanga xiyonat" bilan bog‘liq ayblovlarni asossiz deb hisobladi, zero jinoiy kodeksning bu moddasiga muvofiq kelish uchun xatti-harakatlar "urush sharoitlarida" bajarilgan bo‘lishi kerak. Sudya qaroriga muvofiq, sobiq davlat rahbari "lavozimni suiiste'mol qilish", "og‘ir holatlarni yashirish" va "terakt tergoviga to‘sqinlik qilish"da gumon qilinmoqda. 

Mazkur jinoiy ishni qo‘zg‘atish uchun 2015 yilning yanvarida prokuror Alberto Nisman tomonidan Fernandes de Kirshner va sobiq TIV rahbari Ektor Timerlanga nisbatan  ilgari surilgan ayblovlar asos bo‘ldi. Uning fikricha, sobiq hukumat Eron bilan donni neftga almashtirish to‘g‘risidagi Argentina uchun foydali shartnomaga doir muzokaralar olib borgan. Prokurorning ta'kidlashicha, kelishuv shartlaridan biri - Argentina tomonidan qidirilayotgan 85 kishining hayotiga zomin bo‘lgan teraktga aloqador 5 nafar eronlikni javobgarlikdan ozod qilish bo‘lgan. Nisman Kongressda dalillarni taqdim etishi kerak bo‘lgan kundan bir kun oldin u o‘z uyidan o‘lik holda topilgan. 

Ish qo‘zg‘atilganidan keyin parlament dahlsizligi sabab ozodlikda yurgan Fernandes de Kirshner va ishga aloqadorlikda gumon qilinayotgan boshqa kishilarning advokatlari Bonadioning qarorini apellyatsiyaga berishdi hamda uni iste'foga chiqarishni so‘rashdi. Himoyaning fikricha, sudyaning qarorlari qonunga zid bo‘lib, siyosiy jihatdan asosga ega emas.