Суд Аргентина собиқ президентини қўлга олиш қарорини тасдиқлади

Аргентина суди сенатор ва собиқ президент Кристина Фернандес де Киршнер адвокатларининг 1994 йилда Буэнос-Айресдаги яҳудий маданият марказидаги портлашни тергов қилишга тўсқинлик қилиш айбловлари билан боғлиқ судгача қамоқда ушлаб турилишига доир қарор аппеляциясини рад этди. Пайшанба куни Суд ахборот маркази сайтида шундай мазмундаги қарор тақдим этилди. 

"Кристина Фернандес де Киршнернинг ҳибсга олинишига доир қарор қўллаб-қувватлансин, унинг ижро этилиши судья [Клаудио Бонадио] талаб қилган парламент имтиёзларидан маҳрум этиш жараёнининг натижаларига боғлиқ", - дейилади ҳужжатда. 

Шу билан бирга, юқори инстанция собиқ президентга нисбатан илгари сурилган "ватанга хиёнат" билан боғлиқ айбловларни асоссиз деб ҳисоблади, зеро жиноий кодекснинг бу моддасига мувофиқ келиш учун хатти-ҳаракатлар "уруш шароитларида" бажарилган бўлиши керак. Судья қарорига мувофиқ, собиқ давлат раҳбари "лавозимни суиистеъмол қилиш", "оғир ҳолатларни яшириш" ва "теракт терговига тўсқинлик қилиш"да гумон қилинмоқда. 

Мазкур жиноий ишни қўзғатиш учун 2015 йилнинг январида прокурор Альберто Нисман томонидан Фернандес де Киршнер ва собиқ ТИВ раҳбари Эктор Тимерланга нисбатан  илгари сурилган айбловлар асос бўлди. Унинг фикрича, собиқ ҳукумат Эрон билан донни нефтга алмаштириш тўғрисидаги Аргентина учун фойдали шартномага доир музокаралар олиб борган. Прокурорнинг таъкидлашича, келишув шартларидан бири - Аргентина томонидан қидирилаётган 85 кишининг ҳаётига зомин бўлган терактга алоқадор 5 нафар эронликни жавобгарликдан озод қилиш бўлган. Нисман Конгрессда далилларни тақдим этиши керак бўлган кундан бир кун олдин у ўз уйидан ўлик ҳолда топилган. 

Иш қўзғатилганидан кейин парламент даҳлсизлиги сабаб озодликда юрган Фернандес де Киршнер ва ишга алоқадорликда гумон қилинаётган бошқа кишиларнинг адвокатлари Бонадионинг қарорини апелляцияга беришди ҳамда уни истеъфога чиқаришни сўрашди. Ҳимоянинг фикрича, судьянинг қарорлари қонунга зид бўлиб, сиёсий жиҳатдан асосга эга эмас.