Hindistonda fojia yuz berdi, halok bo‘lganlar ko‘p

Hindiston shimolida avtobusning daryoga qulashi oqibatida kamida 30 kishi halok bo‘ldi, yana 15 inson jiddiy darajada jabrlandi. Bu haqda India Today telekanali xabar bermoqda.

Avtobus Rajistxondagi Savay-Madhopur shahridan Lalsot aholi punktiga yo‘l olayotgan bo‘lgan. Dastlabki ma'lumotlarga ko‘ra, avtobus haydovchisi juda katta tezlik sabab boshqaruvni yo‘qotgan. Avtobus ko‘prikdan daryoga qulagan.

"Savay-Madhopur shahrida Banas daryosiga avtobusning qulashi natijasida kamida 30 kishi halok bo‘ldi, yana 15 inson jiddiy darajada jarohat oldi", - deyiladi xabarda.

Ta'kidlanishicha, jabrlanganlarning barchasi yaqin oradagi shifoxonaga olib ketildi. Fojia joyida qutqaruv amaliyotlari o‘tkazilmoqda.

Mamlakat bosh vaziri Narendra Modi halok bo‘lganlarning oila a'zolariga ta'ziya izhor etdi.