Россиядаги ЙТҲда Ўзбекистон фуқаролари жабрланди
18:20 / 09.01.2018
9550
Фото: РИА "Новости"

Россия Федерацияси Ички ишлар вазирлигининг Саратов вилояти бўйича Бош бошқармаси маълумотига кўра, 2018 йил 7 январь куни тахминан соат 20.00да федерал автомобиль йўлининг 560-километрида йўл-транспорт ҳодисаси рўй берган. Саратов вилояти томон ҳаракатланаётган BMW русумли автомобиль ҳайдовчиси қияликда бошқарувни йўқотиб Рено русумли микроавтобус билан тўқнашган. ЙТҲ натижасида 5 киши жабрланган. Бу ҳақда Ўзбекистон ТИВ ахборот хизмати хабар бермоқда.

Ўзбекистоннинг Россиядаги элчихонаси маълумотларига кўра, барча жабрланганлар, шу жумладан 4 нафар Ўзбекистон фуқароси ва BMW ҳайдовчиси Петров тумани касалхонасига олиб келинган.

Ҳозирги пайтда Ўзбекистон Республикаси фуқароси Чориева Саёҳат Ташпулатовна (1982 йил 30 августда Қашқадарё вилоятида туғилган) Саратов вилояти Петров туманидаги касалхонанинг жонлантириш бўлимига ётқизилган. Унинг ҳолати барқарор, жабрланганнинг ҳаётига ҳеч нарса хавф солмаяпти.

Ўзбекистон Республикаси фуқаролари бўлган Рено микроавтобусининг бошқа йўловчилари енгил тан жароҳати олишган ва касалхонага ётишни рад этишган:

1. Фаёза Рустам қизи Эшпулатова, 1995 йилда туғилган;
2. Мухторхон Пулатович Гиёсов, 1972 йил 6 январда туғилган;
3. Нуриддин Илхамович Хайдаров, 1986 йил 14 февралда туғилган.

Қайд этилишича, ҳозирги вақтда элчихонанинг консуллик бўлими жабрланган аёлга ёрдам бериш масаласини ҳал этмоқда.


Улашинг
Top