H&M brendi "Junglidagi eng zo‘r maymun" sabab qattiq tanqidga uchradi

H&M kiyimlar brendi o‘z saytidagi yangi surat tufayli irqchilikda ayblandi. Unda qora tanli bolakay "Junglidagi eng zo‘r maymun" yozuvi tushirilgan yangi xudida tasvirlangan. Bir sutkaning o‘zida basketbolchi Lebron Jyeyms, The Weeknd musiqachisi va futbolchi Romelu Lukaku kompaniya bilan hamkorlikda voz kechishdi. 

Aslida nima bo‘lgandi?

8 yanvar kuni H&M saytida "Junglidagi eng zo‘r maymun" yozuvi tushirilgan yashil xudi joylandi. Tvitter foydalanuvchilari noroziligiga yozuvning o‘zi emas, kiyimni qora tanli bola reklama qilgani sabab bo‘ldi. Ular bu hodisani irqchilik deb atashdi va oq tanli bolalarning jirafalar hamda yo‘lbarslar tasviri tushirilgan kiyimlarni reklama qilganiga e'tibor qaratishdi.

"Bu juda o‘rinsiz hodisa, haqorat va irqchilikning ko‘rinishidir. Nima uchun oq tanli bola "Junglida omon qolgan"u, qora tanli bola "Junglidagi eng zo‘r maymun" bo‘lar ekan? Buni normal holat deb hisoblaysizmi? Olib tashlang buni. Bu mutlaqo aqlga sig‘maydi!"

"2018 yilda biror brend yoki art-direktor bu qadar noprofessional va loqayd bo‘lishi mumkin emas. Oq tanli bolalarning egnidagi sviterlarga bir qarang. Biz yaxshiroq bo‘lishimiz kerak".

Tez orada H&M saytidan qora tanli bolaning surati yo‘qoldi. Mojaro mashhurlargacha yetib borganida esa, do‘kon bu kiyimni sotuvdan oldi va uning e'lonini ham yopdi. Qora tanli bolaning do‘kondagi surati esa Google keshida qoldi.

Kim aybdor?

Tvitter foydalanuvchilarining noroziliklaridan bir necha soat o‘tib, H&M uzr so‘radi va tanqid o‘rinli ekanini tasdiqladi.

"Saytda bunday surat paydo bo‘lganidan chuqur taassufdamiz, shu bilan birga, bunday kiyimni ishlab chiqarganimizdan afsusdamiz. Biz nafaqat suratni saytdan o‘chirdik, balki xudini xalqaro sotuvlardan ham oldik".

H&M matbuot xizmati

Bloomberg'da ta'kidlanishicha, mojarodan keyin H&M brendi aksiyalari keskin pasaya boshlagan, Danske Bank esa brend egalariga yaqin orada qog‘ozlarni sotishni maslahat bergan. Do‘kon vakillarining qo‘shimcha qilishicha, nazorat jarayonlaridan biri buzilgan, shu bois ular "vaziyatni yaxshilab o‘rganishmoqchi".

Mashhurlar reaksiyasi

H&M'ni birinchi bo‘lib kanadalik musiqachi va The Weeknd prodyuseri tanqid ostiga oldi va do‘kon bilan hamkorlik qilishdan voz kechdi:

"Ertalabdan uyg‘onib, ushbu suratni ko‘rib shokka tushdim va jahlim chiqdi. Men chuqur taassufdaman va boshqa H&M bilan ishlamoqchi emasman".

Shundan keyin taniqli basketbolchi Lebron Jyeyms ham suratga e'tibor qaratdi va H&M xaridorlarni yo‘ldan ozdirayotganini aytdi.

"Men suratda yosh qirolni ko‘rmoqdaman. Sezmaslik mumkin bo‘lmagan dunyo hukmdori, ifodalab bo‘lmas kuch. Biz — afroamerikaliklar doim to‘siqlarni yengib o‘tishimiz va bizning masalamizda odamlar adashayotganini isbotlashimiz hamda yanada qattiq ishlashimiz kerak".

Lebron Djyeyms, basketbolchi

"Manchester Yunayted" futbolchisi Romelu Lukaku ham suratdagi bolani "bo‘lg‘usi qirol" deb atadi, qo‘shiqchi Aziliya Benks esa "bundan keyin hech qachon H&M kiyimlarini xarid qilmasligi"ni ma'lum qildi.

Reper Pi Diddi qora tanli bolaning suratlari motivlari bo‘yicha art taqdim etib, qora tanlilarga nisbatan hurmatsizlikni to‘xtatishga chaqirdi.