H&M бренди "Жунглидаги энг зўр маймун" сабаб қаттиқ танқидга учради
23:35 / 10.01.2018
14574
Фото: H&M

H&M кийимлар бренди ўз сайтидаги янги сурат туфайли ирқчиликда айбланди. Унда қора танли болакай "Жунглидаги энг зўр маймун" ёзуви туширилган янги худида тасвирланган. Бир сутканинг ўзида баскетболчи Леброн Жеймс, The Weeknd мусиқачиси ва футболчи Ромелу Лукаку компания билан ҳамкорликда воз кечишди. 

Аслида нима бўлганди?

8 январь куни H&M сайтида "Жунглидаги энг зўр маймун" ёзуви туширилган яшил худи жойланди. Твиттер фойдаланувчилари норозилигига ёзувнинг ўзи эмас, кийимни қора танли бола реклама қилгани сабаб бўлди. Улар бу ҳодисани ирқчилик деб аташди ва оқ танли болаларнинг жирафалар ҳамда йўлбарслар тасвири туширилган кийимларни реклама қилганига эътибор қаратишди.

"Бу жуда ўринсиз ҳодиса, ҳақорат ва ирқчиликнинг кўринишидир. Нима учун оқ танли бола "Жунглида омон қолган"у, қора танли бола "Жунглидаги энг зўр маймун" бўлар экан? Буни нормал ҳолат деб ҳисоблайсизми? Олиб ташланг буни. Бу мутлақо ақлга сиғмайди!"

"2018 йилда бирор бренд ёки арт-директор бу қадар нопрофессионал ва лоқайд бўлиши мумкин эмас. Оқ танли болаларнинг эгнидаги свитерларга бир қаранг. Биз яхшироқ бўлишимиз керак".

Тез орада H&M сайтидан қора танли боланинг сурати йўқолди. Можаро машҳурларгача етиб борганида эса, дўкон бу кийимни сотувдан олди ва унинг эълонини ҳам ёпди. Қора танли боланинг дўкондаги сурати эса Google кэшида қолди.

 

Ким айбдор?

Твиттер фойдаланувчиларининг норозиликларидан бир неча соат ўтиб, H&M узр сўради ва танқид ўринли эканини тасдиқлади.

"Сайтда бундай сурат пайдо бўлганидан чуқур таассуфдамиз, шу билан бирга, бундай кийимни ишлаб чиқарганимиздан афсусдамиз. Биз нафақат суратни сайтдан ўчирдик, балки худини халқаро сотувлардан ҳам олдик".

H&M матбуот хизмати

Bloomberg'да таъкидланишича, можародан кейин H&M бренди акциялари кескин пасая бошлаган, Danske Bank эса бренд эгаларига яқин орада қоғозларни сотишни маслаҳат берган. Дўкон вакилларининг қўшимча қилишича, назорат жараёнларидан бири бузилган, шу боис улар "вазиятни яхшилаб ўрганишмоқчи".

Машҳурлар реакцияси

H&M'ни биринчи бўлиб канадалик мусиқачи ва The Weeknd продюсери танқид остига олди ва дўкон билан ҳамкорлик қилишдан воз кечди:

"Эрталабдан уйғониб, ушбу суратни кўриб шокка тушдим ва жаҳлим чиқди. Мен чуқур таассуфдаман ва бошқа H&M билан ишламоқчи эмасман".

Шундан кейин таниқли баскетболчи Леброн Жеймс ҳам суратга эътибор қаратди ва H&M харидорларни йўлдан оздираётганини айтди.

"Мен суратда ёш қиролни кўрмоқдаман. Сезмаслик мумкин бўлмаган дунё ҳукмдори, ифодалаб бўлмас куч. Биз — афроамерикаликлар доим тўсиқларни енгиб ўтишимиз ва бизнинг масаламизда одамлар адашаётганини исботлашимиз ҳамда янада қаттиқ ишлашимиз керак".

Леброн Джеймс, баскетболчи

"Манчестер Юнайтед" футболчиси Ромелу Лукаку ҳам суратдаги болани "бўлғуси қирол" деб атади, қўшиқчи Азилия Бэнкс эса "бундан кейин ҳеч қачон H&M кийимларини харид қилмаслиги"ни маълум қилди.

Рэпер Пи Дидди қора танли боланинг суратлари мотивлари бўйича арт тақдим этиб, қора танлиларга нисбатан ҳурматсизликни тўхтатишга чақирди.

 

A post shared by Diddy (@diddy) on


Улашинг
Top