Andijonda bir guruh qizlar ishtirokidagi mojaro yuzasidan ma’muriy chora ko‘rildi

Ijtimoiy tarmoqlarda tarqalgan video ortidan 7 noyabr kuni Andijon shahrida voyaga yetmaganlar o‘rtasida ro‘y bergan janjal bo‘yicha tekshiruv o‘tkazildi. Mojaroda ishtirok etgan qizlarning ota-onalariga nisbatan MJtK 47-moddasi tartibida ma’muriy bayonnomalar rasmiylashtirildi.

Foto: Ijtimoiy tarmoqlar

Ma’lumotlarga ko‘ra, Andijon shahrining Mustaqillik mahallasida joylashgan 6-sonli ko‘p qavatli uy oldida voyaga yetmagan fuqaro E.M. Andijon shahri Sho‘rbuloq mahallasida istiqomat qiluvchi voyaga yetmagan Yu.D. bilan o‘zaro kelishmovchilik sabab janjallashgan.

Yu.D. bilan birga kelgan dugonalari — voyaga yetmaganlar Sh.B., A.I. va I.M. mojaroga aralashgan va natijada E.M. tan jarohati olgan. Hozirda hodisa bo‘yicha Andijon shahri bo‘yicha IIO FMB tomonidan tergovga qadar tekshiruv harakatlari olib borilmoqda.

Shu bilan birga, voyaga yetmaganlar Yu.D., Sh.B., A.I. va I.M.ning ota-onasiga nisbatan Ma’muriy javobgarlik to‘g‘risidagi kodeksning 47-moddasi bo‘yicha ma’muriy bayonnomalar rasmiylashtirildi.

Tayyorlagan: Отабек Матназаров

#Andijon #mojaro #qizlar