Франция мигрантларни қабул қилиш марказлари кўламини кенгайтиради
17:00 / 14.01.2018
3725
Фото: AP

Франция ҳукумати 2018 йил давомида мамлакатдаги мигрантларни қабул қилиш ва жойлаштириш билан шуғулланувчи тажрибавий марказлари кўламини  кенгайтиради. Ички ишлар вазири Жерар Колон Parisien газетасига берган интервьюсида шу ҳақида маълум қилди. 

Унинг сўзларига кўра, ҳозирги вақтда мамлакатда CAES'нинг янги "қабул ва вазиятни таҳлил қилиш марказлари" ишламоқда ва улар 1300 ўринга мўлжалланган. Лойиҳанинг муваффақияти ҳукуматнинг бу марказларни кенгайтириш қарорини келтириб чиқарди. 

"Мазкур лойиҳа муваффақиятини инобатга олиб, яқин ойларда минтақада 200 ўрин очишни кўзлаяпмиз... Иль-де-Франс минтақасида (пойтахт минтақаси) ўринлар сони 900 тага етади", - дейди Коллон. 

Вазирнинг аниқлик киритишича, Франция ҳукумати январь ойи охирига бориб 200 ўрин ва 2018 йил давомида яна 200 ўрин эксплуатациясини йўлга қўймоқчи. У Париж остидаги Ри-Оранжи коммунасида ҳам янги CAES маркази очилишини қўшимча қилди.

Кале порт шаҳрида аввал мигрантларнинг энг йирик лагери жойлашган бўлган. 2016 йилнинг ноябрида лагерь кўчирилган бўлишига қарамай, минтақага мигрантлар келишда давом этмоқда.

"Каледа 400 нафар одам қолди, ўтган йили эса 7 минг мигрант ўша ерда бўлган. Яна 50 га яқин мигрант Грант-Сент коммунасида истиқомат қилмоқда. Ҳали-ҳануз Англияга кетиш истагида бўлганлар бор. Шимол ва Па-де-Каледа беш CAES марказини очдик. Кўчаларда ухлайдиганлар уларга мурожаат қилишни истамайди, чунки улар Франциядан бошпана беришни сўрамоқчи эмас", - деди Колон.

Европа Иккинчи жаҳон уруши давридан кейин энг жиддий миграцион инқирозга юз тутмоқда. Бунга биринчи навбатда Африка ва Яқин Шарқ мамлакатларидаги қуролли тўқнашувлар ва иқтисодий муаммолар сабаб бўлмоқда.  


Улашинг
Top