Turkmanistonda yuqori mansabli mulozimlar va mamlakat MXX xodimlari hibsga olindi 

Turkmanistonda qator yuqori mansabli amaldorlar, jumladan, mamlakat milliy xavfsizlik xizmati xodimlari korrupsiyada ayblanib hibsga olindi. Bu haqda qator mustaqil nashrlar xabar bergan.

Xabarlarga ko‘ra, Toshhovuz viloyatida iqtisodiy jinoyatlar bilan kurash bo‘yicha xizmat MXXning bir necha zobitlarini poraxo‘rlik hamda giyohvand moddalar savdosi bilan shug‘ullanuvchilarga ko‘mak ko‘rsatish ayblovi bilan ushlagan.

Turkmaniston davlat OAV hozircha huquqni muhofaza qilish organlarida ommaviy hibsga olishlar ro‘y bergani haqida xabar bermadi.

Shuningdek, Ashxobodning Kopetdog‘ tumani soliq inspeksiyasi rahbari va bir necha xodimi korrupsiyada ayblanib hibsga olingan.

Eslatib o‘tamiz, 2017 yilning oktabr oyi oxirida Turkmaniston prezidenti Davlat xavfsizligi kengashi yig‘ilishida davlat apparatida korrupsiya bilan kurash bo‘yicha chora-tadbirlarni amalga oshirish talabini qo‘ygandi.