Livanda falastinlik eng keksa qochqin ayol vafot etdi

Livanda falastinlik eng keksa qochqin ayol Amina Qosim Shahobiy vafot etdi.

Livanning NNA axborot agentligining ma'lum qilishicha, 120 yoshli Shahobiy o‘z ona yeridan Isroil davlati yaratilishi vaqtida 1948 yilda haydab chiqarilgan.   

O‘shanda ayol oilasi bilan Livanning Sayda shahridagi “Ayn Al-Xiva” lagerida qo‘nim topgan.

“70 yil o‘tdiki ham, biroq xolam o‘limigacha vatanini qo‘msab yashadi. U qachondir uyiga qaytishiga umid qilgan va bizga ona qishlog‘i – Falastin shimolidagi Arab Zabid haqida gapirib berardi”, deb eslamoqda ayolning jiyani Ziyod Shahobiy.

Uning aytishicha, momoning 5 farzandi va 30 dan ko‘proq nabirasi bor.

Ayni vaqtda dunyoda falastinlik qochqinlar soni 5,9 mln gacha yetgan (tabiiy ko‘payish hisobga olingan holda).