Turkiya o‘z chegaralari xavfsizligini ta'minlashga haqli – Boris Jonson

Turkiya o‘z chegaralari xavfsizligini ta'minlashga haqli, deb yozdi Buyuk Britaniya tashqi ishlar vaziri Boris Jonson tvitterda.

Jonson Buyuk Britaniya Turkiya tomondan Suriyaning Afrinida o‘tkazilayotgan “Zaytun shoxi” operatsiyasi borishini kuzatayotganini qo‘shimcha qilgan.

Uning ta'kidlashicha, London va Anqaraning Suriyadagi maqsadlari bir-biriga mos tushadi. “Bu keskinlikni kamaytirish va Bashar Asadning iste'fosiga olib keladigan siyosiy jarayondir”, deb yozgan Jonson.

20 yanvarda Turkiya Afrinda kurd mudofaa kuchlariga qarshi operatsiya boshlagan. Turkiya qurolli kuchlarining Suriya hududida harakatlanishidan maqsad terrorchilar va terrorchilik tuzilmalari obektlarini yo‘q qilish hisoblanadi. Ta'kidlanishicha, Turkiya armiyasi Afrindagi tinch aholiga ziyon yetkazmaslik uchun barcha ishni qiladi.  

Bashar Asad tuzumi Afrinni 2012 yil iyulida kurd jangarilariga jangsiz topshirgan. Ta'kidlanishicha, bu yerda harakat qiluvchi terrorchilar nafaqat Turkiyaning chegaraoldi hududlariga, balki “Frot qalqoni” operatsiyasi doirasida jangarilardan ozod qilingan Suriya hududlari aholisiga hamda Idlibdagi deeskalatsiya hududidagi suriyaliklarga xavf soladilar.