O‘zbekiston Milliy xavfsizlik xizmati xodimlari Harbiy prokuratura va Bosh prokuratura huzuridagi departament vakillari bilan birgalikda IIV Qorovul qo‘shinlariga shartnoma asosida harbiy xizmatga fuqarolarni chaqirish bo‘yicha firibgarlik sxemasini tuzishda gumonlangan ikki shaxsni qo‘lga olishdi.
"Tezkor xodimlar Buxoro viloyatining Qorovulbozor tumani shoshilinch tibbiy yordam bo‘limi terapevt shifokori 50 yoshli Mahliyo Tuyevani 3,5 ming AQSh dollarini olish chog‘ida ashyoviy dalil bilan ushlashdi. U bu pullar evaziga IIV Qorovul qo‘shinlariga shartnoma asosida harbiy xizmatga chaqiriqda yordam ko‘rsatish niyatida bo‘lgan", - deya ta'kidlab o‘tdi huquqni muhofaza qiluvchi organ vakili.
Qo‘lga olingan shaxs sherigi borligini ko‘rsatgan – IIV 1-chi alohida qorovul bataloni sobiq harbiy xizmatchisi, 1980 yilda Olot tumanida tug‘ilgan N.Xujjiyev. Keyinchalik u ham ko‘rsatilgan 3,5 ming AQSh dollarini olish chog‘ida ushlandi.
Bosh prokuratura huzuridagi departament tomonidan ushbu holat bo‘yicha M.Tuyeva va N.Xujjiyevga nisbatan JKning 168-moddasi (firibgarlik) va 211-moddasi (pora berish) bo‘yicha jinoyi ish qo‘zg‘atildi.
