Тошкент вилояти Ўртачирчиқ туманида 2013-2015 йилларда барпо этилган намунали уйлар, гарчи қурилганига саноқли йил бўлганига қарамай, уни харид қилганларнинг норозилигига сабаб бўлаётгани, мутасадди ташкилотлар муаммони ҳал қилишда сансалорликка йўл қўяётгани ҳақида хабар қилган эдик. Баъзи фуқаролар камчиликларни ўз кучлари билан бартараф этишга уринаётгани хусусида фикрлар билдирилди. 

Аммо, бу каби ҳолатлар биргина Тошкент вилоятининг Ўртачирчиқ туманида барпо этилган намунали уйларда бўлгандир, деб ўйласангиз хато қиласиз. Юқоричирчиқ тумани “Тинчлик” маҳалла фуқаролар йиғинида барпо этилган 800 га яқин намунали уйлар қўрғонидаги намунали уйларнинг ҳам муаммоси талайгина эканига ўрганишларимиз чоғида гувоҳ бўлдик.  

Йўллар асфальт қилинмаган. Биз учрашган фуқароларнинг сўзларига кўра, асфальт қилингани ҳам такрор-такрор мурожаатлардан сўнггина амалга оширилган. Гарчи бу ҳудуддаги Чиқиндини ташиб кетиш хизмати йўлга қўйилмагани боис, аҳоли бу муаммони қандай бартараф этишни ҳануз билмайди.

“Тоза ҳудуд” давлат унитар корхонасининг туман бўлими аҳолининг мурожаатларига қарамай, ортиқча чиқинди ташиш машинаси йўқлиги важидан бу муаммони ҳал этишни пайсалга солмоқда. 

Бундан ташқари, Илҳом Муҳаммедов ва Саидхўжа Шамсиевнинг айтишича, пудратчилар кўчаларга ёритқичларни ўрнатмаган, аҳоли ўз ҳисобидан пул йиғиб, ёритқичлар ўрнатишмоқда.

Биз уйларга узатилган электр симларининг уланишига ҳам эътибор қаратамиз. Шуми, замонавий турар жойларнинг “намунаси”? Аксарият уй эгаларида кадастр ҳужжатлари ҳам йўқ. Бунга, суҳбатдошларимизнинг айтишича, намунали уйларни қабул қилиш жараёнининг якунланмагани сабабдир. 

Бу ерда ичимлик суви муаммоси ҳам бор гап. Аҳоли вакилларига кўра, шу уйлар қурилиши сабаб бир неча пудратчи қурилиш фирмаларининг раҳбарлари қамалиб кетган. “Бизни ажаблантирган нарса, бир кун қарасам, қурувчиларга овқат пишириб юрган ошпазнинг ҳам “прораб” бўлиб олгани бўлди”, - дейди ҳамсуҳбатимиз. 

Биз ушбу муаммолар гирдобидан чиқиб, Юқоричирчиқ тумани ҳокимлигига бордик ва ҳокимнинг қурилиш масалалари бўйича ўринбосари Элёр Раҳмонов билан учрашдик.

Туман “Тоза ҳудуд” давлат унитар корхонаси мулозимининг айтишича, шу йилнинг биринччи чорагида битта чиқинди ташувчи юк машина ва трактор харид қилинади. Айни вақтда 130 минглик туман аҳолисига атиги 6 та чиқинди ташиш машинаси тўғри келади. Бу 20 мингдан ортиқ аҳолига битта машина хизмат қилишини англатади. 

Янги харид қилиниши режалаштирилган чиқинди ташиш машинаси айнан “Тинчлик” маҳалласига хизмат кўрсатишига жалб этилади, дейди мулозим. Унинг айтишича, намунали уйлар ҳудудларида ёки қишлоқларда шаҳарлардаги чиқинди тўпланадиган пунктларга ўхшаш бинолар қурилмаслигига сабаб шуки, намунали уйлар шаҳарда барпо этилган эмас. Шу боисдан, аҳоли чиқиндиларни ўз уйларида махсус идишда сақлаши, ҳафтанинг белгиланган кунида кўчага олиб чиқиб қўйиши талаб этилади. Чиқинди ташувчи машина жадвал асосида келиб, чиқиндиларни ўзи олиб кетади. Энди ёзнинг иссиқ кунида чиқинди ҳовлида бир ҳафта туришини тасаввур қилиб кўринг-а? 

Хуллас, гапнинг индаллосини айтганда, ҳозирча, туман ҳокимияти наздида бир журналист келди-ю, кетди. Гўё ҳаммаси рисоладагидек. Бироқ бизни ва халқни натижа қизиқтиради холос. Илк натижани биринчи чорак якунида кўрамиз. 

Энди бир масалага эътибор қаратсак. Ҳозирги вақтда ҳам шундай қурилишлар давом этмоқдами, давом этмоқда. Шу ўринда кўплаб саволлар ғужғон ўйнайди, уларга жавоб топишга қийналиб миямиз шишиб кетади: 

Уйларни ким қуряпти, уларнинг тегишли мутахассислиги борми? Деворларга ғишт тераётганлар малакаси қайдаражада, уйларни тегишли тармоқларга улаётганлар тажрибаси-чи? Янги намунада барпо этилаётган коттежлар ва уйларда ҳам худди шундай қинғир ишлар бўлмаётганини ким сидқидилдан назорат қилади? Бизда борми шундай ташкилот? Бор бўлса, қурилганига 3-4 йил бўлган уйлар устидан шикоят қилувчилар нега жуда кўп? Қурилиш соҳасида қачон шаффофлик таъминланади?

Мана, яқинда Саудия Арабистони Ўзбекистонда шундай қурилишларга грант ажратиши ҳақида хабарлар пайдо бўлди. Улар ажратаётган пуллар мақсадли сарфланишини ким кафолатлайди? Ёинки, янги намунали уйлар қуришни - давлат, халқ пулини ўмариш, саноқли кишилар чўнтагини қаппайтириб, бир неча йилга “ўтириб” чиқиб, кейин ҳеч нарса бўлмагандек, таралла бедод юриши мумкин, деб тушуниш керакми? Афсуски, бу саволларга ҳозирча жавоб йўқ! Юқоридаги камчиликлар учун жавобгарликни зиммасига оладиган мард ҳам йўқ?

Youtube'да кўриш

Mover.uz'да кўриш